Ich Angnes, weylandt Albrecht Greissnnechker saligenn tochter unnd Walthaser Newndlinger saligenn verlasne witib zw/ Rottennegk bekenn fur mich unnd mein erbenn, das fur mich komenn ist Thamen, ambtmann yn Gengenn und/ badt mich diemuttigklich, das ich im die hernach geschribenn zechennt, so von mir zw lechenn sein geruecht, zw verleihenn, die/ sein erb wernn, die thyann von meinem liebenn gemachell saligenn Walthaser Newndlinger in gmacht weysz an mich/ kumenn ist, das ich thann macht unnd gwalt zw verleichenn hab nach inhaltung brieff unnd sygell, die er mir dar-/ uber gebenn hat, das hab ich gethann unnd sindt das die zechenndt zw Ober Achleyten, ganczn zechenndt unnd auffm/ Hals zwytaill zechenndt unnd ligenn in Gramellsteter phffar unnd mann soll albeg am tritn jar zw lechenn/ stewr gebenn fumff schiling pffening, als oft es sich verwanndellt mir unnd mein erbn; also verleich ich im die/ zechenndt ym unnd seinen erbenn, was ich zw recht rechtlich das an verleichenn soll oder mag wissennlich in krafft/ des briefs, also insolichenn beschaidenn, das er unnd sein erbenn als oft es sich verwanndelt von mir unnd meinen erben/ zw lechenn nemen er mag auch er unnd sein erbenn das nunn furbasser von mir unnd meinenn erbenn in lechens-/ weysz in haltenn, nuczenn unnd niessen, als thann lechenn unnd im landt zw Ossterreich ob der Enns recht ist un-/ gevarlich, doch mir unnd meinen erbenn unnd meiner lechenschafft unvergriffennlich unnd an schadenn; mitt/ urkunndt des brieffs besygelt mitt meinen aygenn anhangentenn insygell, gebenn an sannd Gregory tag des/ heilechen pabst als mann zallt nach kristi gepuerdt tausenndt vier hunndertt jar unnd im fumffunnd-/ neuczigistenn jare.