Wir Johannes von gotes genaden Bischof ze Pazzaw bechennen und tuen kuent, das fuer uns kome, die erber Elspet Pilgreims, des Straiffing, dem got genad, witibe, des ersamen vesten Ritter Niklas des Wuerffels tochter, und hat uns beweiset, mit unsers vorvodern seligen gedacht-nuzze, hern Albrechtz weilent Bischof, ze Pazzaw, briefe, den wir gesehen und gehoert haben, das ir, Hanns Straiffing, dem auch got genad, weilent ir sweher, mit des egenanten unsers vor-vodern hannt, gunst, und willen, zue der zeit, do er es wol getuen mocht, recht und redleich geben, und gemacht hat, zu rechter morgengab, nach des Lanndes recht, ze Oestereich, fuer sechs hundert phunt wienner phenning, halben zehent ze Haimburch, weinzehent und traid-zehent, chlainen und grossen, in allen dem rechten, und mazze, als der brief lawtt, und sagt, der ir von dem obgenanten Hannsen dem Straiffing darueber geben ist, und wannd derselb zehent, von uns, und von unserm Gotzhaws ze Pazzaw lehen ist, bestâten wir nach vleizziger pêt, der vorgenanten Elspeten, dasselbe gemacht, und gab ir morgengab, in dem rechten, so vor beruert ist, als morgengabs, und des Lanndes ze Ostereich recht ist, und als wir zuo recht suellen, und muogen, Mit urkunde des briefs besigelten mit unserm angehangen insigel. Geben ze Wienn an sand Petronelle tag, Nach kristi gebuorde drêwtzehen hundert iar, und in dem einem, und achtzigisten iare.

Source Fulltext: Peter Peusquens