Ich Mörl der Jude Lehenmannes sun, und ich Draehel sein housvrowe, und ich Suezman der Jude von Tuln, und ich Ramel sein housvrowe, wir veriehen und Tun chunt allen den die disen prief lesent oder horent lesen, die nu lebent und her nach chunftich sint, daz wir mit unserr erben guten willen und gunst, mit verdachtem mute, ze der zeit, do wir ez wol getun mochten, und auch mit unsers Gruntherren hant des erbern mannes hern Herborts auff der Seul, recht und redelichen gesatzt haben unser hous daz da leit in der Wiltwurcher strazze ze Wienne zenaehest Fridelins house des Juden Lehenmannes aydem, daz weiln gewesen ist Marcharts von Regenspurch, mit allem dem nutze und rechte als wir ez in purchrechtes gewer her pracht haben, dem erbern manne hern Chunraten dem Wiltwurcher purger ze Wienne und vron Agnesen seiner housvrowen, und ir paider erben, fur den weingarten der da leit an dem Wartperge und haizzet die Grube ze rechter ebenteur und auch ze rechtem gewern und scherm als des Landes recht ist ze Osterrich, so beschaidenlichen ob im dar an icht abe gienge daz schol er haben gentzlichen auff dem egenanten house in allem dem rechte und vor geschriben stet, und geben im des disen prief ze ainem offen urchunde und gezeuge und ze ainer ewigen vestnunge diser sache versigilten mit des vorgenanten unsers Gruntherren Insigel hern Herborts auff der Seul, wand wir selber aygens Insigels niht enhaben und auch mit des erbern Ritters Insigel hern Hagens von Spilberch ze den zeiten Juden Richter ze Wienne, die diser sache gezeuge sint mit iren Insigeln, und ander frume leute genug. Diser prieff ist geben ze Wienne nach Christes geburt dreutzehenhundert jar, dar nach in dem Neun und zwaintzigistem jar, an sand Ulreichs Tage.

Source Fulltext: Peter Peusquens