Ich Niclas der Wuerffell. Vergich und tun chund Allen den die den prief lesend oder horent lesen die nu lebent und hernach kunftig sind, das ich mit gutem willen mit wolbedachtem mut, Geschaft han vonerst virtzechen phunt gelts purkchrechts die ich han auf der Padstuben die do haisset die Huenttinn vor Stubentor ze wienn zu der zeit do ich es wol getun mochtt und mit meins Suens hannd Niclas des Wuerffels, zu den zeiten Amptman des chlosters ze Newnburg lewtterleich durch Got und durch mein und meiner hawsfrawen seligen und aller meiner vor-vodern und Nachkomen und allen glaubigen Selen hails willen, gegeben und gewidembt han, Gib und widemb Rechtt und redleich mit dem brief in Gotesleichnams Process des achten tags gotsleichnams, meins ledigen erbguets meinen weingarten glegen an dem purkchstal des ein halb iewch ist zenachst der Chottrerinn weingarten Doman alle iar von dient dem chloster ze Newn-burg fumff virtail weins ze perchrecht und drey helbling ze voitrecht und nicht mer. Also das derselb weingarten pey der egenanten Gotsleichnams Process mit den vorgenanten virtzechen phunten ewichleich beleiben und davon nymmer emphroemdet weden sol in dhain weg. Also daz derselb achterd tag gotsleichnamtag Got zelob und zeern iêrleich und ewichleich davon begeen sol mit der Process mit hundert Priestern der man igleichem zwelif wienner phening geben sol und mit vesper, metten des nachtes und ampt gesungen in der argel und mit allen ziern und wirden als Gotesleichnam tag zebegeen Sittleich und gwonhait ist und alz ich In begangen han. Und sullen auch die vorgenanten virtzechen phunt guelt und der weingart pey der Pymeld ewichleich beleiben daz es nymmer abgee, und sol auch von demselben gelt und weingarten mir und allen meinen vorvodern und Nachchomen Selen zehail und zetrost in sand Stephans Tumchirchen ze Wienn, einen ewigen Jartag begeen alle iar des nechsten tags nach dem achtten tag gotsleichnam des nachtes mit ainer gesungen vigili und des morgens mit einem gesungen Selampt mit allem gotsdienst als Sit und gwonhait ist. Und schaff hintz sand Michel ze Wienn auch ain phunt gelts zu einem ewigen Jartag den man auch begeen sol des nachtes mit der vigili und des morgens mit dem Selampt auch nach dem achten tag gotsleichnam daz man auch ausrichten sol von der vorgenanten gult und weingarten zu dem phunt gelts daz man In geit zu der Process und daz alles sol begen alle iar jêrleich mein eltister Sun oder Erb. Wêr aber daz, daz mein eltister Sun oder erb sewmig wêrn und nicht begiengen als vorgeschriben stet . So schullen sich der.Brobst. der Rat und der Kirchmaister datz sand Stephan ze Wienn der gult und weingarten undertziechen, und aym andern meinem Erben emphelhen der es begee. als ich es ausgerichtet und begangen han als vorgeschriben stet, und Si dartzue halten als lanng daz der vorgenant Gotsleichnam achterd tag und die jartêg iêrleichen davon begeen in der weise so vorgeschriben stet. Wêr aber daz man daz gult abchauffet daz sol denn wider angelegtt werden, als es daz pest fueget und nutz ist und daz in chain weg emphroemdet werde. Und daz daz geschêft und Stift fuebaz also stêt und untze-brochen beleib. Daruber so gib ich obgenanter Niclas der Wuerffell fur mich und fur all mein Erben den brief zu einem waren urkund der sach versigilten mit meinem angehangen insigil und mit des vorgenanten meins Suens insigil Niclas des Wuerffels Ambtman des vorgenanten chlosters ze Newnburg und mit meins pruder insigil Paulen des Wuerffell und mit der zwaien erbern mann insigiln, Michels des Gewkramer ditzeit Purgermaister und Muenssmaister ze Wienn und Stephans des Leitner purger daselbens die ich des vleissichlich gebeten han daz Si der sach getzewgen sind mit iren angehangen insigiln denselben zwain zewgen an schadenn. Der brief ist geben ze Wienn nach Christi gepurd drewtzechenhundert jar darnach in dem fumff und newntzgistem jar des nechsten Montags vor sand Michels Tag. Anno domini Mo CCCo LXXXXVIIIo obiit dominus Nicolaus Tess(eris) Miles vigilia assumptionis Marie virginis circa horam nonam emisit spiritum.

Source Fulltext: Peter Peusquens