Ich Ruedolff und ich Ludweig gepruder von Tyrna. Wir vergechen fur uns und fur all unser Geswistreid und Erben und tun chunt offennleich mit dem brief, das wir uns des mit unsern trewn an ayde stat und an alles gever verlubt und verpunden haben, luben und verpinden auch uns wizzentleich mit chraft ditz briefs. Gegen den Erbern weisen..dem Burgermaister..dem Richter und..dem Rat der Stat ze Wienn und gegen allen irn Nachchomen umb die Padstuben gelegen in der Wollzeil ze Wienn, die wir verchauft haben dem Erbern Hannsen dem Zinkken nach seins chawfbriefs sag den er von uns darumb hat den sy mit der Stat GruntInsigel besigelt und bestaett habent. Also ob das waer das In icht chriegs oder ansprach von desselben besigelns wegen auferstund von wem das waer das sullen wir In alles ausrichten und widercheren an allen irn schaden. Und suellen auch Sy das haben auf uns unverschaidenleich und auf allen unsern Gutern Erbguetern und varund gutern wie die genant oder wa die gelegen sind die wir haben in den Lannden ze Osterreich oder wa wir Sy haben wir sein lebentig oder toed. Und daruber zu einem warn urchund und getzeug geben wir In fur uns und fur all unser Geswistreid und Erben den brief versigelten mit unsern anhangunden Insigeln. Der brief ist geben ze Wienn. Nach Christes gepurd drewtzehenhundert Jar darnach in dem Sechs und Neuntzigistem Jare des nachsten Mittichens nach sannd Kathreyn tag der Heiligen Junkchfrawn.

Source Fulltext: Peter Peusquens