Ich Herman der Schiekch zu den zeiten Spitalmaister der purger Spital vor Kêrnêrtor ze Wienn Vergich fuer mich und fuer mein Nachkômen die desselben Spitals nach mir Spitalmaister und verwerser werdent und tuen chund offenleich mit dem brief, das ich von des gepots wegen so weilent der hochgeborn fuerst Hertzog Ruedolf sêlig von Oesterreich in der Stat und Vorsteten ze Wienn umb gruntrechts und purkchrechts ablosung auf gesatzt und gepoten hat Recht und red-leich abtzeloesen gegeben han, dem erbern Mann Jannsen dem Trawtmann dem ledrer purger ze Wienn und seinen Erben vier wienner phenning geltes gruntrechts, von den zwayn und dreissig phenning geltes, die das vorgenant Spital gehabt hat auf irm haws und Stadel gelegen in dem Gerewt vor Stubentor ze Wienn zenechst Jannsen haws des Palweyns an ainem tail, und zenechst des egenanten Jannsen des Trawtmans haws an dem andern tail, umb zwen und dreizzig wienner phenning, der mich derselb Janns Trawtman gantz und gar gewert hat Also das er und all sein Erben, und Nachkoemen, die das egenant ier haws und Stadel nach In ynnhabent und besitzent, der egenanten vier phenning geltes gruntrechts fuerbas ewikchleich darab ledig und fray sein suellen und der davon nicht mer gepunden sein ze dienen und suellen auch ich noch all mein Nachkomen noch ander yemant von des egenanten Spitals wegen fuerbas auf das vorgenant Haws und Stadel umb die obgenanten vier phenning geltes weder mit briefen noch uerchund noch an brief und uerchund nymmer mer chain ansprach noch vodrung haben noch gewinnen, in dhainen wege wannd dasselbe Spital auf dem egenanten haws und Stadel, nicht mer hat, denn noch nur achtt und zwaintzig wienner phenning geltes purkchrechts. Wer aber das fuerbas icht brief oder uerchund fuerbracht wuerden von wem das wêr die auf dasselb haws und Stadel, umb die obge-nanten vier phenning geltes sagten, dieselben brief und urchund suellen denne alsverr und Si dieselben vier phenning geltes ruerent, aller ding tod und zenicht sein und chain kraft haben weder chlain noch gros Und darueber so gib ich In den brief zu einem warn uerchund der sach versigilten mit des obgenanten Spitals vor Kêrnêrtor anhangundem Insigil. Der brief ist geben ze Wienn nach Kristi gepuerd drewtzehenhundert jar darnach in dem Syben und Newntzgistem jar des nechsten phintztags vor dem Prehemtag.

Source Fulltext: Peter Peusquens