Ich Wolfger der Choeberl von Prunn vergich und tuen chunt. allen den die disen prief lesent oder hoerent lesen. die nu lebent oder hernach chunftich werden. daz ich mit verdochtem muet. und mit gutem willen und uoch mit meiner swester Katreyn willen und gunst aller meiner erben und uoch nach der der pesten meiner vreunde rat. verchuoft han die wartung, die ich han nach meiner mueter toed. vron Hiltgunden. der Choberlinn daz mein rechtes erbe ist von meinem vater Fridreichen dez Choeberleins ze prunn. dem got genad. meinen halben hof. der do leit ze Prunn zenoest wolfgers hof dez reichen. mit allem dem nutz und recht und dar zue gehoert ze veld ze dorff versuecht oder unversuecht gestift oder ungestift. swie so daz genant ist. umb oecht phunt phenning wienner muniz. der ich recht und redleichen verricht und gewert pin. dem erbern manne Niclosen meinem Oechaim meiner mueter prueder und seiner huosvrowen vron Gerdrauten und ieren erben. fuerbaz nach meiner egenanten mueter toed vron Hiltgunden vreileichen ze haben. und allen ieren frumen do mit schaffen verchuoffen versetzen und geben sweme siu wellen an allen ierrsal. und dient der vorgenant halb hof. zue puerchrecht. vierdhalben schilling phenning wienner muniz. alle jar an sand Micheles tag. dem erbern mann Chuenraten dem Schytzen ze Prunn. und seinen erben. und dient uoch fiunf metzen voyt habern gewienne in die puerch. alle jar. nach dem Neun ze welher zeit und man dar nach chumpt. in dem jar. und nicht mer. und pin uoch ich vorgenanter Wolfger der Choberl dez egenanten hofes halben nach meiner vorgenanten mueter toed vron Hiltgunden ier rechter scherm und gewer fuer alle an sprach nach dez Landes recht ze Osterreich. und wann ich vorgenanter Wolfger nicht aygens insigels han. dar ueber gibe ich in disen prief zue einem offen uerchuend und ze einem woren gezeug diser sache. versigelt mit meines rechten amptmanes insigel. hern Chuenrates dez Lonholtz ze Medlich. der dez vorgenanten guetes zue den zeiten rechter stifter und stoerer ist gewesen. und ist der sache gezeug mit seinem insigel. und mit hern Hainreiches insigel von Eysenbuerch zue den zeiten meiner vrowen der Herzogin Hofmaister. Herzog Hainreiches saeliges witteb. von Oesterreich. und von Steyr. der diser sach uoch gezeug ist mit seinem insigel. und sind dez gezeug datz Prunn. Chuenrat Urban. Engelprecht Hebrant. Peter sein prueder. Gyleys. und datz Engelschalichstorf Ulreich zue den zeiten meiner vrown der Herzogin Per(ch)maister. und Ewerhar Cholbel. Niclos der Chreusz. Walther der Payr. und datz Medlich. Dietreich Vaelschel. Seyfrid sein prueder. Ulreich der smit. Ruedger der paungartner. und ander erber Leut genuech den dise sache wol chunt ist. Diser prief ist geben ze Medlich do man zalt von Christes gepuerde dreuzehen hundert jar. dar nach in dem vier und dreyzgistem jar. an sand Jacobes tage.

Source Fulltext: Peter Peusquens