Ich Hanns der Huetznpergêr zue den zeyten der Edlen und hochgeborn fuerstinn frawn Johannen von Puelln Hertzoginn ze Osterreich etc. meiner genêdigen frawn Sneyder Vergich und tuen kund offenleich mit dem brif Als den erbêrn weysen..dem Burgermaister..dem Rychtêr. und dem Rat der Stat ze Wienn . Junkchfraw Kathrey Mertten sêligen des Swêbleins des ledrêr Tochter mit-sambt andern waysen Junkchfrawn und Knaben mit leyb und mit guet in Ir trew und phleg em-pholhen sind nach alten rechten und gueten gewonhaiten der vorgenanten Stat ze Wienn Und wenn Sy mir die vorgenan Junkchfrawn Kathrein eleichen gelobt haben ze geben Darumb so hab Ich mich gegen In mit meinen trewen angevêr verlûbt und verpunden Lûb und verpind auch mich gegen In wissentleich mit dem brif wenn daz ist das mir die egenant Junkchfraw Kathrey mit leyb und guet Inantwurt und gegeben wyrt das Ich denn furbas von meinem und Irn Guetern mit der vorgenanten Stat leyden dulden und Stewren sal als ander mitpurgêr phlichtig und gepunden sind an alles gevêr Und wann ich selber nicht aygens Insigils darueber so gib ich In den brif ze einem warn offen urkund und getzeug der sach versigilten mit der erbern Insigiln Achatzien von Velben die zeyt des Edlen und hochgeborn fuersten Hertzog Wilhalms ze Osterreich etc. meins gnedigen herren grosser Schenkch und Chunrats des Stikchelpergêr die ich des vleizzichleich gebeten hab das Sy der sach getzeugen sind mit Irn Insigiln In an schaden Darunder ich mich verpind mit meinen trewn angevêr alles das gentzleich stêtzehaben und zelaisten das vor an dem brif geschribn stet Der geben ist ze Wienn nach Kristi gepurde virtzehenhundert Jar darnach in dem funften Jar des Mantags nach sand Pawls tag zue der becherung.

Source Fulltext: Peter Peusquens