Wir Rûdolff der Angerfelder zû den zeiten Burgermaister und der Rat gemayn der Stat ze Wienn Tun kund offenleich mit dem brif umb das zûhaus gelegen an dem Kynmarkcht ze Wienn das weylent des Gewchramer gewesen ist und stozzet vor an des hochgeborn fursten, Hertzog Leuppolts ze Osterreich etc. unsers genêdigen herren grossem haws. Und wannd derselb unser genêdiger herr, dasselb zuhaws gegeben hat, Hannsen dem Stayndlein seinem klainem Schenkch nach des brifs sag den er Im darûb gegeben hat Darumb haben wir mit gutem willen und mit walbedachtem muet und mit willen und wissen des hochgeborn fursten Hertzog Wilhalms ze Osterreich etc. unsers genêdigen herren desselben hawses den egenanten Hannsen den Stayndlein In Nutz und Ingewer gesatzt und setzen auch wissentleich mit dem brif Also das er das vorgenant zûhaws sal furbas ledichleichen und freileichen haben und allen seinen frumen damit schaffen verchauffen versetzen und geben wem er welle an allen krig und irrsal. Und darueber So geben wir dem vorgenanten klainem Schenkchen Hannsen dem Stayndlein den brif ze einem warn offem urkund und und getzeug der sach versigilten mit der vorgenanten Stat ze Wienn Klainem Anhan-gundem GruntInsigil Der geben ist ze Wienn nach Kristi geburde virtzehenhundert Jar darnach in dem fuenften Jar des Mantags vor sand Kathrein Tag der heiligen Junkchfrawn.

Source Fulltext: Peter Peusquens