Ich Peter der Scholderwein dietzeit Chuerherr datz sand Stephan ze Wienn Vergich offenleich mit dem brief daz mich die erbern mann Hanns der Zyrnast und Hanns der Mosprunnêr dietzeit baid ausrichter und volfurêr des gescheffts so Hanns der Arnstorffer dem Got genad getan hat, verrichtet und gewert habent, zwaintzig phunt wienner phenning die mir derselb Hanns der Arnstorffer geschafft hat alls das selb geschêfft vor dem Rat der Stat ze Wienn mit erber kunt-schafft beweyst ist, und alls es ze einer ewigen gedêchtnuess in dem Statpuch geschriben stet, Und sag auch ich die vorgenanten zwen geschêfftherren und all Ir Erben der egenanten zwaintzig phunt phenning gentzleich quidt ledig und los, Mit urkund des briefs versigilten mit der zwayer erbern Mannen hern Niclas des Weyspacher, dietzeit hubmaister in Osterreich, und Fridreichs von Aschpach dietzeit urtailschreiber ze Wienn und lantschreyber in Osterreich aufgedrukchten Insigiln die ich des vleizzigleich gepeten han ze gezewgnuess der sach in an schaden Darunder ich mich verpind alles daz stet ze haben das vor geschriben stet, wannd ich selber aigen Insigil nicht hab. Geben ze Wienn an sand Erasms tag Nach Kristi gepurd viertzehenhundert jar darnach in dem Sybenten jar.

Source Fulltext: Peter Peusquens