Edler und wolgeborner herre Meinen willigen gehorsamen dinst ewrn gnadn zue allen zeiten beraiten edler herr als ich ewrn gnaden merstund verschriben hab umb ein Gelait das mir zu allen zeiten gegen meins herren und ewrn gnaden abgeborben ist und also umb das mein chum und dartzu von demselben in Intzicht gelegt bin als ir auch ytz an des hochgeborn fursten Hertzog Albrechts zu Osterreich etc. brife meins genedigen herrn wal horn werd Bitte ich noch ewr edler mechtichait, daz mir Gelait widerfar so wil ich noch heut vor des egenanten meins herren und ewrn gnaden gern furkom umb all sach wort und werch und mich verantwurten und ewrn gnaden in allen sachen gern volgend sein wil vindet Ir mich gerechten des lat mich genissen wurde ich yndert anders erfunden das wider meins herren gnad wider die ewr land lewt trew oder er wêr So sol ich hinfur gehalten werden fur einen ungerechten und getraw ewrn gnaden wol das Ir mir das Schreiben meins herren brif nicht ze uebl halt wann ir wal versten mugt das ich also chum umb das mein und umb mein er dartzu kom sold Wann ich zu allen zeiten begirlich tun wil was ew und allen den ewrn lib und dinst ist, Datum in der Neunstat Anno domini etc. Quadringentesimo XIIImo. Conrad Ernst der ewr alltzeit

Source Fulltext: Peter Peusquens