Ich Hans auf der Sewl burger ze wienn Vergich fuer mich und mein erben und tuen allen den die den brief lesent oder horent lesen die nu lebent und hernach kuenftig sind, daz ich mit guetem willen und mit wolbedachtem muet zue der zeit da ich es wol getuen moecht und mit handen hern Rudolfs des Angervelder zu den zeiten Burgermaister und des Rats gemain der Stat ze Wienn, verchauft hab, ainen Gewantkeller gelegen under den langen tuechlauben ze wienn zenêchst Hermans von Eslarn gewantkeller daman alle Jar von dinêt auf Sand Joergen altar in Sand Michels pfarrkirchen ze wienn fûnf phund wienner pfenning ze purckrecht und nicht mer. Denselben gewantkeller hab ich recht und redlichen verchauft und geben mit allen den nûtzen und rechten als er unversprochenlichen von alter in purckrechts gewer herchoemen ist, umb achtzig pfund wienner phenning, der ich gantz und gar verrichtet und gewert bin, dem erbêrn mann Hansen dem Poben burger ze wienn frawen Dorothen seiner hausfrawen und Ir baider erben fuerbas ledichlichen und freilichen zehaben und allen Iren frummen damit ze schaffen verkauffen versetzen schaffen machen und geben wem Sy wellen an allen Irsal. Mit der beschaidenheit, daz Sy mit der vorgenanten Stat ze wienn davon leiden als ander mitburger daselbs. Und zu pesserer sicherhait So setz ich mich mitsambt meinen erben unverschaidenlichen uber den obgenanten Gewantkeller In zu rechten gewern und scherm fuer alle ansprach, als purckrechts recht ist und der Stat Recht ze wienn. Wêr aber daz In an demselben Gewantkeller icht krieg oder ansprach auferstuend von wem das wêr mit recht oder ob In mit recht daran icht abgieng was Sy des schaden nement sullen wir In gêntzlichen ablegen und widerkeren, an allen Iren schaden. Und sullen Sy das haben datz mir und meinen erben unverschaidenlichen und auf allem unsern guet das wir haben in dem land ze Oesterreich oder wo wir das haben wir sein lebentig oder tod Und daz der kauf fuerbas also stêt und unzebrochen beleib, daruber gib ich In den brief zue ainem warn urchund und ewiger vestnung der sach versigelten mit meinem Insigel und mit der Stat GruntInsigel ze wienn, daz der Rat der Stat daselbs zue merer sicherhait und meiner fleissigen bet willen an den brief gehangen hat. Der geben ist ze wienn an freitag nach Sand Matheus tag, des heiligen zwelifboten und Ewangelisten Nach Christi gepuerd vierzehenhundert Jar darnach in dem dreyzehenden Jare.

Source Fulltext: Peter Peusquens