Ich Jacob der Maeserl zue den zeiten Obrister Spitalmaister der Purger Spital ze wienne. vergich an des selben Spitals stat . und tuen chunt allen den die disen brief lesent oder hoerent lesen umb die dreu phunt wienner phenninge geltes Purchrechtes . dae deu erber vrowe . vrowe Elzbet Chunrats wittibe des Metsieder den got genade . dem vorgenanten Spital geschaft und geben hat . auf Wolfharts weingarten des watmanger der da leit ze Obern Suefringen an dem Phaffenperge des ein viertail ist zenaehst Wilhalms weingarten in dem Strohof . daz der selbe Wolfhart oder swer den selben seinen weingarten nach im besitzet . vollen gewalt und recht habent . daz si die egenanten dreu phunt geltes ab loesen suln swelhes iares si muegent oder wellent mit andern drin phunden geltes Purchrechtes . swo si die chauffet in der stat ze wienne . und nindert anders . und die alz guet guelt sei . alz die egenanten dreu phunt geltes sint . Und gib in dar ueber disen brief zue einem urchunde und zue einem gezeuge diser sache versigilt mit meinem Insigil . und mit hern Chunrats Insigil des wiltwaericher zu den zeiten Purgermaister ze wienne . der diser sache gezeuge ist mit seinem Insigil . Diser brief ist geben ze wienne nach Christes gepurt dreutzehen hundert iar dar nach in dem viertzgisten iar an sant Bartholomes Tage.

Source Fulltext: Peter Peusquens