Albrecht von gotes gnaden Roemischer kunig zu allen zeiten merer des Reichs, ze Ungern ze Behem Dalmacien und Croacien etc kunig, hertzog ze Oesterreich etc. Erbern weisen, und lieben getrewn. Als wir dir..unserm Burgermaister, vormaln geschriben und empholhen haben, daz du von unsern wegen, daran sein soltest, damit von unserm getrewn, Casparn dem Pirchvelder, unserm Buerger ze Wienn, von allem Innemen und Ausgeben, so er von dem guot, weilent Jacoben des Olmutzperger Sun, getan hat, ain gantze und voellige raittung genomen, und er, wider Recht nicht gedrungen wurd etc. Hat uns der yetzgenant Pirchvelder furbracht, wie unser getrewr.. der Spitalmaister ze Wienn, maine, von Im, von des egenanten Olmuntzperger Sun wegen, ain Raittung ze haben, und Im, an seinem Ausgeben, so er von seiner wegen getan hat, nichts abzeziehen, und wie derselb Spitalmaister, den knaben, zu Im genomen und In uberredt hab, daz er Im all sein Erbgut, und varund gut, hab ubergeben, damit desselben knaben nachsten Erben als des obgenanten Pirchvelder hausfraw, und seine kinder, wider Recht enterbt wurden, und wie er ew darauf umb ain bestettbrief angerufft hab, als Ir an der zedl hiein beslossen werdet vernemen. Emphelhen wir ew, und wellen erstleich, daz Ir den egenanten Pirchvelder, wider Recht in nichte dringen lasset, Sunder mainet ye der obgenant Spitalmaister, raittung von Im ze haben, als oben gemeldet ist, daz er dann, ain gantze und voellige Raittung, von allem seinem Innemen und Ausgeben, des egenanten knaben guots dieweil er In Inngehabt hat, neme, als pilleich und Recht ist, und daz Ir solch ubergeben, als der egenant knab getan sol haben mitnichte bestettet, und anderswa, bei den Gruntherren von unsern wegen bestellet, damit das nicht bestett, und die Rechten erben nicht enterbt werden, Sunder das angesteen lasset, untz wir, oder unser Ret in Oesterreich, am nachsten hinaus gen Wienn komen. So wirdet man die sachen verhoern, und darin handeln, als pilleich und Recht ist. Daran tut Ir gentzleich unser maynung. Geben ze Prag an Mitichen, vor sand Jacobs tag. Anno etc. tricesimo octavo. Unserr Reiche etc. im ersten jar, under unserm Secret. com(missi)o d(omini) r(egis) in cons(ilio).

Source Fulltext: Peter Peusquens