Meinen willigen dinste In aller wolbeheglichkait Ewr aller Ersamen guete andaechtikhlichen mit ganntzen trewen Steetes bevoer .. wolfort ewr aller Ersamen weishait, wer Ich gern alltzeit gern vernemend, als von mir selber. Derselben wirdigen weisheit Ich verkundige wye Czaepek mit andern seinen helffern und mit einer wagenpurgkh ettlich wochen fur Caschaw sich geslagen hatten .. Da Sy mit schickhung des Allmechtigen Gotes mit schannden abgetzogen und merklichen grossen schaden emphangen haben und gar vil dem tod ergeben sind .. und weren Sy noch ettlichen tag beliben keyner oder gar wenig solten davon komen seyn .. Also pin ich mit meiner macht getzogen auf Rynolden von Rozgan, der wolt ein kloster besatzt haben, Froena genanndt, der hat sich meiner Genedigen frawen, der kunigin, ergeben tzu dienste bis in seinen tod pey Iren genaden tzu beleiben mit allen seinen helffern .. Darnach hab Ich Ingenomen das kloster, Telkeban genanndt, das pangraetz gehalten hat .. Da von wil Ich obgotwil den feynden grossen schaden tuen und liben herren frewnde, und liephaber, Ich dannkch gar sere ewr aller hochwordikeit das Ir alle der gerechtikait beylegt, und tuet noch das pesst bey derselben gerechtikait, als ich das vor allen andern besunder gross getrawen hab tzw ewr aller Ersamen weishait und guete .. Der Ich mich bevelhe und dy auch Got der Herre enthalde tzw seligen langen leben. Geben zu Caschaw am Montag vor sand Matheus tag Anno domini etc. XLprimo. Johan Giskrae von Brandis obrister Hauptman etc. und Graf tzu Sarusch Urk. 2826 b r ERsamen hochweysenn besundern liben herren frewnde, und liphaber. Ich bitt ewr weishait Ir wellet mir verkunden wye es dort aussen bey ewch stee und alle sachen gelegenhait haben Das will Ich willigklichen umb verdienen In einem solichen oder Merern.

Source Fulltext: Peter Peusquens