Ich Margreth Hannsen des Pobem seligen witib Bekenn das mir die ersamen herren Symon Potel dietzeit des Rats der Stat zu Wienn und Erasem der Ponhaimer burger doselbs dietzeit baid verbeser der Stat Gruntpuecher ausgericht und gegeben habent vier phunt phening versessens diensts So mir die Geistleichen frawn hintz Sand Niclas vor Stubentor zu Wienn sind schuldig gewesen und zu der egenanten Stat Gruntpuch nider gelegt hetten. Dovon sag Ich fur mich und all mein erben die vorgenanten verbeser der stat gruntpuecher und Ir nachkomen der vorgenanten vier phunt phening gentzleich Quitt ledig und los vor aller ansprach und vadrung ungeverleich Mit urkund des briefs versorigt mit der Erbern Lucasen des Godinger meins lieben bruders und Philip-pen des Sailer Burger zu Wienn aufgedrugkchten Petschaden die Ich zu zewgnuss der sachen mit vleis darumb gepeten hab In und Ire erben an schaden darunder Ich mich mit meinem trewen verpind alles das stet zu haben das vor geschriben stet. Geben an montag vor sand Maria Magdalen tag Anno domini etc. Quadragesimo Secundo.

Source Fulltext: Peter Peusquens