Gotfridus dei gratia Episcopus Ecclesie Pataviensis ad perpetuam rei memoriam. Ea que cultis divini augmentum concernunt, grate sunt approbationis munimine roboranda. Laudabilem igitur intentionem discreti viri Pauli, dicti Poll de Nurrenberch civis Wiennensis, et Katherine uxoris sue, qua unam perpetuam missam, in altari beate Marie virginis in nova abside Cappelle sanctorum Philippi et Jacobi, in domo quondam Leublini, nunc existentis predicti Pauli, Wienne, nostre dyocesis perpetuo celebrandam, cum certis redditibus, ad eandem missam per predictum Paulum et uxorem ipsius, ac per subsidium Wernheri presbiteri, quibusdam redditibus ad hoc emptis per ipsum similiter et donatis, ut in litteris utriusque apparet, dotaverunt et instauraverunt in domino conmendantes, ipsam misse observationem et dotationem, sicut in litteris inde factis continetur, eo excepto, quod predicte misse cappellani negli(g)entia seu culpa, per nos tantum vel nostros et non per patronum vel quempiam alium laycum, vel de quibus in litteris dicti Pauli mentio fit suppleatur vel etiam corrigatur, quantum provide facte sunt, ratificamus et presentibus confirmamus. In quorum testimonium presentes iussimus fieri litteras sigilli nostri appensione communitas. Datum Wienne Johannis Baptistae, anno domini Millesimo CCCmo. XLsimo Nono.

Source Fulltext: Peter Peusquens