Wir Albrecht von gots genaden Hertzog ze Oesterreich ze Steyr ze Kernden und ze Chrain Graf ze Tyrol etc. Bechennen mit disem brief daz wir dem erbern Priester, Pauln, Chapplan der Chapellen in dem Werde, vor Werder Tor ze Wienne gelegen, under den Ledrern, geguennet und erlaubt haben, als ein rechter Lehenherre derselben Chapellen. Guennen und erlouben ouch mit disem brief, daz er daz haus in der Weyhenpurg ze Wienne, das zuo derselben Chapellen gehoert hat, mit unserm willen verchauffen mag, und sol, ane alle irrung, und dasselb Gelt anderswo wider anlegen, mit einer gewizzen, an ein haus, das seinen Chapellen, pezzer und bas, gelegen sei, denne daz haus in der Weyhenpurg gewesen ist, und das ouch ewichlichen bei derselben Cha-pellen beleib, und darzuo gehoere, ane alle widerrede und geverde, doch uns, und unserm lieben Bruoder, Hertzog Leuppolten, daran, behalten unserr Lehenschaft und Rechten, die wir billich daran haben sullen. Mit urkunt ditz briefs. Geben ze Wienne an sant Merteins Tage Anno domini Millesimo Trecentesimo Sexagesimoquinto. dominus dux. dominus cancellarius. marscalcus provincialis.

Source Fulltext: Peter Peusquens