Wir Albrecht von gotes gnaden, Hertzog ze Oesterreich, ze Steyr, ze Kernden, und ze Krain, Graf ze Tyrol etc. Embieten unsern getrewen lieben, allen unsern Lantherren, Rittern, Knechten, Purggrafen, Richtern, Mauttner, zollnern, und allen andern unsern undertanen, und amptleuten, den diser brief gezaigt wirt, unser gnad, und alles guot. Wan wir, nicht mainen, daz man kainen ungrischen wein in unser land gen Oesterreich fuere, ez sey danne ains rechter pawwein, den mag man, wol dahin gefueren. Davon gepieten wir, ew ernstlich, und wellen, pei unsern hulden, daz ir schaffet, und understet, daz furbaz mer, chain ungrischer wein, in das egenante unser land gefuert werde, ez sey danne ains pawwein, den mag man wol dahin fueren, ane irrung. Wer aber, daruber ungrische wein fueret in das egenante unser Land, haben wir geschaffet, daz man die aus der stat neme, und niderslahe, als man vormals ouch pei unsern vordern getan hat. Geben ze Wienne an freytag vor sand Mertten tag. Anno domini Millesimo CCCo Sexagesimo sexto. Mars(calcus) provincialis. Tumerstorffer Perngerus.

Source Fulltext: Peter Peusquens