Wier der Rath von Chrems und von Stain, veriechen an disem prieff und tun chunt, allen den die in sehent, oder hornt lesen, daz ein chrieg ist gewesen zwischen dem Erwern herren Brobst Wisent von Walthausen an Einem tail und Gotfriden dem arm Pilgrim, und seiner Bruder Chunrat und Pilgrim dem andern tail, und chriegten umb einen weingarten an dem Gobling, der weilent ist gewezzen Hainrichs des arm Pilgrim dem Got genade, der selbe chrieg ist vericht gar und gaentzlich an alles gevaerde, nach unserm rat, und nach ander erwer laeut rat, und paidenthalben mit guetlichem willen, also, daz die vorgenanten drei Bruder sich fuerzicht habent getan dez vorgenanten weingartens, daz seu, nach ir erben nimmer mere dehain ansprach schullent dor auf haben, und schol der vorgenant Brobst Wisent und sein Gotzhaus den vorgenanten weingarten fuerpaz haben ledichlichen an allen chrieg, und schullent do von gedencken, dez vorgenanten Hainrichs dez arm Pilgrim, und hern Ulrichs seines sunes sele, und dor uber geben wier disen prief versigelt mit der Stat Insigel ze Stain zu einem urchunde und zu einem gezeug diser sach. Der prief ist geben, do von Christes gepurt worn ergangen dreuzehen hundert jar, dor nach in dem vier und zwaintzistem jar, des montages vor dem auffert tag.

Source Fulltext: Peter Peusquens