Ich Hainreich der Chewnspies ze wienne und ich Margret sein hawsvroue vergehen fuer uns und fuer alle unser erben und tuen chunt offennleich mit dem brief. Das wir gar und gentzleichen verricht und bezalt sein der viertzenthalben schilling wienner phenning die uns worden und gevallen sind, von des hawses wegen gelegen in dem huenergezzlein ze wienn das weiln der Waldnerinn gewesen ist, das ich egenante Margret mitsampt andern meinen miterben verchaufft han, und davon mir die egenanten phenning gevallen und worden sind. Und darumb sullen auch wir umb dieselben phenning hintz niemant furbas nymmer mer chain anspruch noch vodrung haben noch gewinnen weder vil noch wenig . besigilt mit unserm aufgedrucktem petschat. Geben ze wienn an sand Valteins tag . anno LXXXImo.

Source Fulltext: Peter Peusquens