BONIFATIUS episcopus, servus servorum Dei, carissime in Christo filie Marie, regine Sicilie illustri, salutem et apostolicam benedictionem. Affluentis devotionis affectus quo erga romanam | ecclesiam matrem tuam pollere dinosceris, promeretur, ut personam tuam, multis utique virtutum titulis insignitam, favoribus prosequentes uberibus votis tuis in hiis potissime liberaliter annuamus et per | que divine maiestatis conspectui reddaris acceptior, gratiosior habearis tibique preter laudis humane preconium salutis cumulus producatur. Habet siquidem exposite nobis tue petitionis | assertio quod inter cetera desideria mentis tue illud pregrande fore conspicitur, ut sacer fratrum Predicatorum ordo in orto plantatus ecclesie ad laudem et gloriam summi regis per tue | sollicitudinis studium tuique ministerii solertiam curiosam prosperis successibus gaudeat, letis fecundetur eventibus et votivis proficiat incrementis. Quare supplici postulabas instan|tia, ut in monasterio Sancti Petri ad Castellum de Neapoli ordinis Sancti Benedicti moniales sive sorores eiusdem Predicatorum ordinis ponere ac instituere libere | valeas, ut in illo ipse ac ille que in ipso monasterio eis successerint perpetuis futuris temporibus permaneant, benignam tibi licentiam concedere dignaremur. Nos itaque huiusmodi tuum | laudabile desiderium salubreque propositum dignis in domino laudibus attollentes et volentes patris more benivoli, ut illud de apostolice sedis liberalitate munifica efficaciter impleatur. Gerentes | quoque circa prefatum Predicatorum ordinem specialis dilectionis affectum tibi prelibatum monasterium Sancti Petri cum domibus, officinis, viribus et pertinentiis suis omnibus ubilibet | constitutis necnon thesauro, reliquiis et ecclesiasticis ornamentis auctoritate apostolica de gratia speciali concedimus et donamus tibique ponendi ac instituendi libere in eodem | moniales sive sorores ipsius Predicatorum ordinis, usque ad numerum de quo tua viderit expedire discretio, ut per eas necnon et illas que ipsis in eodem monasterio successerint ibidem perpetuo sub | ipsius ordinis observantia virtutum domino serviatur plenam et liberam auctoritate predicta licentiam elargimur. Ut autem moniales sive sorores predicte, que in eodem mona|sterio pro tempore fuerint, in suis actibus salubrius et honestius dirigantur, auctoritate memorata statuimus et etiam ordinamusa ut in monasterio ipso priorissa continue | habeatur a monialibus ipsisb sive sororibus communiter eligenda. Quodque predictum monasterium omnibus et singulis privilegiis, indulgentiis, gratiis et concessionibus gaudeat, | que [l]ocis aliis e[iusde]m Predicatorum ordinis a sede apostolica su[nt] [co]ncessa. Nulli ergo omnimo hominum l[icea]t hanc paginam nostre concessionis, donazioni[s] statuti et ordinatio|nis infringere vel ei ausu temerario contrarre. Siquis autem hoc attemptare presumpserit indignationem omnipotentis Dei et beatorum Petri et Pauli, apostolorum eius, se noverit | incursurum. Datum Laterani .V kalendis martii, pontificatus nostri anno septimo. (BD).