Quoniam fluxibilitati memorie succurritur potissime per suffragium litterarum, Nos vniuersi Ciues de Chrems constare cupimus tam presentibus quam futuris harum testimonio litterarum, quod fratres domus de Pavngartenperg tanquam prouidi futurorum, iuxta confessionem ementium suas vineas circa Chrems sitas ad proprietatis tytulum uendiderunt, interpositis conditionibus subnotatis, videlicet ut decimis earumdem vinearum exclusis, que ad dictos fratres primitus libere pertinent et precise, quilibet ex supradictis emptoribus partem vini, quod sibi de sua vinea prouenerit, tribuat annuatim ita, quod quidam duas vrnas tantum, quidam uero terciam partem omnium prouentuum ipsis soluant. Et ne ad personas potentes vel aliter ad seruiendum inhabiles dictas uineas presumant alienare, promiserunt ijdem studiosius precauere. Adiectum fuit etiam in ipsa uenditionis forma, quod vinum, quod ex dictis vineis prouenerit, nusquam nisi in torculari curie prenominatorum dominorum exprimi debeat vel colari, transgressorum vero proprietas in eisdem vineis ad sepe dictos absque contradictionis obstaculo reuertetur, nisi de speciali licentia aliud a procuratore curie petitum fuerit et concessum. Ne autem huiusmodi contractum per calumpniam aliquis ualeat infirmare, ipsum dicti fratres conscribi petiuerunt et Sigillorum videlicet Ciuitatis nostre et Domini Gozzonis munimine roborari Testibus annotatis, quorum hec sunt nomina: Dominus Gozzo, Siboto frater suus, Zaizmannus, Irnfridus filius Gozzonis, Helwicus, Chunradus de Hederstorph, Rudlo de Maevrperg, Prechtlo scriba et alij quam plures. Acta sunt hec Anno domini M. CC. LXXI. V. Idus octobris.

Source Fulltext: OÖUB 3 (Wien 1862) S. 382-383, Nr. 415