Quoniam mutabilitas temporum humanas acciones frequenter consueuit facere mutabiles et caducas, prouide a sapientibus ad perpetuacionem memorie scripturarum remedium est inuentum. Hinc est, quod nos vniuersitas ciuium de Chrems ad singulorum noticiam tam presencium quam futurorum cupimus peruenire testimonio huius scripti, quod domina Elizabet relicta Zaizmanjn quinque libras reddituum wiennensis monete, quas idem Zaizmannus in vltima voluntate adhuc racionis et sensuum compos Ecclesie in Poungartenperg ob anime sue remedium ordinauit, quarum dimidietas videlicet tercia dimidia libra in festo Notiuitatis domini et altera dimidietas in festo Pasce de Pomario sito ex opposito contra curiam decimalem in Stain annis singulis exsoluetur procuratoribus ecclesie memorate jn eisdem terminis conferre promisit cuiuslibet contradiccionis obstaculo procul moto, jnterclusis condicionibus subnotatis, quod, si eadem domina E. negligens exstiterit in soluendo peccuniam prenotatam, pars pomarij equiualens redditibus supra dictis vacabit Ecclesie in Poungartenperg simpliciter et precise, dummodo probabiliter constiterit, ipsam dominam a possessoribus pomarij eandem peceuniam percepisse. Si vero ipsam non percepit, debet fideliter et efficaciter laborare, vt dicta ecclesia a detentoribus habeat summam peccuniarum pretactam. Ceterum si dictum Pomarium propter inundacionem sew impulsum aquarum defensionem vel emendacionem indigere ceperit, domnus Abbas uel eius legitimus procurator primitus requisitus vnacum alijs in ipso pomario jus obtinentibus expensas necessarias facere non negabit. Tandem adiectum fuit, quod, si fratres dicte ecclesie in eodem pomario porcionem Juris ipsis contingentem vendere decreuerint, ipsam dominam E. super hoc primo requirere et sibi pro precio debito et condigno in empcionem acquiescere tenebuntur, quod si recusauerit ad vendendum, cuicumque voluerint, habebunt liberam facultatem. In cuius rei testimonium presentes literas de huiusmodi testamento ac ecclesie solucione percipienda in certis terminis annuatim plenam facientes memoriam et expressam conscribi fecimus et Sigilli Ciuitatis nostre munimine conumuniri (sic) assignantes easdem ecclesie sepe dicte in memoriale perpetuum atque Robur, Nominibus testium annotatis nichilominus, que sunt ista: dominus henricus de hag, dominus Erbo de Egennburga Milites, Siboto frater Gossonis tunc judex, Rude quondam judex, Irnfridus filius Gossonis, Walchunus frater suus, Engelbertus gener Tairmanni, Vlricus de Winchel, Vlricus filius suus, Vlricus gener eiusdem, Hilperus de Stain, Wichardus, heinricus Velserius, Ebero, Gebhardus, Ebero, Wichardus. Acta sunt hec Anno domini M. CC. LXXXII. Quinto Ydus Nouembris.

Source Fulltext: OÖUB 3 (Wien 1862) S. 554-555, Nr. 604