In nomine domini Amen. Cum in humanis actibus sic plerumque memorie obliuio preiudicet, vt, quod temporaliter agitur, simul cum tempore dilabatur, Necesse est, vt, quod ab hominibus geritur, Scripture testimonio perhennetur. Ego igitur heinricus de o^ed cupiens de Rebus a deo collatis michi in Celeste Gazophilacium saluberrimam reperire porcionem, duxi publice protestandum, quod super curia sita in lanngenacker, in qua jus proprietatis Monasterio in Pawngartenperg iusto titulo conpetere dinoscitur ab Antiquo, sic videlicet, quod in signum eiusdem proprietatis eidem monasterio de eadem Curia Quadraginta denarij dari Annis singulis consueuerunt, omnem censum, qui ad Jus, quod uulgo kaufrecht dicitur, tam in denarijs quam in alijs quibuscumque de predicta michi Curia conpetebat, cum voluntate et consensu heredum meorum prefato cenobio per Manualem resignacionem ob anime mee remedium libere erogaui jta, quod ex nunc et jn antea prefatum cenobium eundem censum in suis vsibus teneat et Annuatim in Natiuitate Beate Marie Virginis percipiat pleno jure hac condicione, vt post mortem meam jn Anniuersario meo de censu predicto fratribus sew Conuentui Monasterij antedicti plenum seruitium Annis singulis ministretur. In cuius facti euidenciam atque robur hanc litteram cum Sigillo meo dedi Monasterio supradicto. Testes sunt Wernhardus de Ruspach, Hartmudus de Smida et Vlricus filius eius, Bezelo de Erbing, Vlricus et Leutoldus fratres de Mitterberch, Marquardus de Osterwerch, Vlricus Hauser, Ortolfus de Chersperch, Heinricus de Winthag, Heinricus Inntzinger, Fridericus Trachter et alij quam plures. Actum Anno domini Millesimo ducentesimo Nonagesimo quarto, Octauo Ydus Julij.

Source Fulltext: OÖUB 4 (Wien 1867) S. 208-209, Nr. 228