Ich Hainrich der o^eder Offenn vnd vergich an disem brief, das jch vnd mein hausfrau gerdraut gelübt haben ze geben ab vnnser beder Seel dem gotshaws datz Pawngartenperg mit verdachtem muet vnd do wir es wol getuen mochten Ein Phundt gelts mit sotaner beschaidennhait, Welicher vnndter vns des Ersten stirbt, so sol das annder desselben phundt gelts das vor genant Gotshaws gewaltig machen vnd weren. Vnd ist das getan, das die vorgenant mein hausfraw vor mir stirbt, so ist ledig von Ir tail dem vor genanten Gotshaws mit aller Irer Erben guetlichem willen ein hueb datz Guetenprun oben in dem dorf, die ist an Zehen ein halb phundt gelts, vnd sol ich für meinen tail, des dennoch wirt Zehen vnd ein halb phundt gelts, geben dem vor genannten Gotshaus von meinem Zehent datz Sebaren all Jar einen mutt khorns alslanng, vntz ich dasselb phundt gelts ganntz mach. Ist aber das getan, das ich zem ersten stirb, so sol di vor genannt mein hausfraw vnd meine kind geben dem vorgenannten Gotshaus jn Jarsfrist oder vor, ob Si mag, an Sand Merteinstag meins guets Süben phundt phenning, Mit dem sol der Abbt kauffen of der Stat zehn vnd ein halb phund gelts oder er geb für dieselben phenning aws des gotshaws Vrbar als vil aigenns, damit dj vor genannt güllt ganntz werd. Als das geschicht, so sol derselb Abbt von demselben phund gelts seiner Samnung geben ein Vols dienst alle Jar an Sand Marein Magdalenen tag. Darüber zu einem Vrchundt des vor genannten geschefft Wil ich zu meinen tagen alle iar geben derselben Samnung Sechtzig phenning vmb visch an dem vorgenanten tag Sand Marein Magdalen. Vnd vber die Red all gib ich dem vor genannten Gotshaws disen brief mit meinem Innsigl zu einem ewigen Vrkundt. Ditz ist geschehen, do von Crists geburt erganngen waren Tausent vnd drew hundert iar vnd ein Jar.

Source Fulltext: OÖUB 4 (Wien 1867) S. 403, Nr. 434