Ich Woch der Ochssenpeckh vergich vnd tu^en kundt an disem brief allen den, die nun sind vnd hernach ku^enftig werdent, das ich mit meiner hausfrawen fraw Margreten vnd Vlrichs vnd Alhaiden meiner gsweyen vnd aller meiner Erben guetlichen willen dem Gotshaws von Pawngartenperg han gegeben ein acker zu chauffen, der leit datz Scheiching vmb fu^enfftzehn Schilling phenning Wiener, vnd bin der schon gewert mit alle dem Recht vnd ich jn han gehabt, versuecht vnd vnuersuecht, vnd bin desselben Ackhers des vorgenannten Gotshawss Gwer ich vnd all mein Erben. Vnd das diser gewerft sta^et vnd vnuerwanndelt beleib von mir vnd von meinen Erben ewiclichen, des gib ich woch dem Gotshaws von Pawngartenperg disn brief zu eim Vrchundt mit herrn Marquarts Innsigel von Osterwerch versigelt, der bey den Zeiten landrichter was in dem Machlannd, wenn jch selbs nicht Innsigels han. Des sind gezewg her Marquart von Osterwerch, her leutolt von Mitterberch, her Wetzel von Erwing, her Vlrich von dem Stain, herr Ott von Sachssn, her hartweich von chuleub, Fridrich vnd Chunrat die Lempl, Ott vnd walchun die Mitterchircher vnd darzu manig pidwerman, das ist geschehn, do von christs geburd ergangen waren drewtzehen hundert Jar, darnach jn dem Vierdenn Jar ann Sannd Jo^ergenntag.

Source Fulltext: OÖUB 4 (Wien 1867) S. 460, Nr. 496