Ich Sighart der Greymenstainer tuen khundt allen den, die nun sind vnd hernach kunfftig werdennt, die disen brief lesennt oder lesen ho^erent, das ich meines freyes aigens ein lehen, das ist genannt Hertweiges lehen in dem Wittperg han gegeben dem Gotzhaws von Pawngartenberg der Gustrey zu dem liecht durch got vnd durch meiner Seel willen mit meins suns Vlreichs vnd aller meiner Erben guetlichem willen mit allem dem Recht vnd ich es han her gehabt, versuecht vnd vnuersuecht vnd bin desselben lehenns des vor genannten Gotzhawss Gwer jch vnd annder mein Erben, wo in des not wirt. Das dise red stet vnd vnzebrochen fu^erbas beleib, gib ich dem vorgenannten Gotzhaws disen brief bestetiget mit meinem Innsigell zu einer Ewigen vrchunde vnd des sind gezewg alle die, der namen hie geschriben sind, her Vlrich der Marschalh, her hainrich vnd her Marquart di o^eder, her hainrich vnd herman vnd Chunrad die Rigler, Gernot von gatern vnd darzu manig erber man Ritter vnd knecht, die dabey gewesenn sind. Das ist geschehen, do von Cristes geburd erganngen waren dreytzehen hundert jar, darnach in dem Sechsten jar an Sannd Lucas tag.

Source Fulltext: OÖUB 4 (Wien 1867) S. 510, Nr. 547