Ich Dietreich purger dacz ybs tv^en chunt allen den, di disen prief sehend vnd ho^ernt lesen, daz ich gechauffet han vmb mein varnd gut, daz ich erarbait han, einen weingarten dacz Chrems, der leit an dem Haelnstain vnd han den gemainet ze einem selgeraet der Samnvng dacz Pawngartenperig mit meiner Hawsvro^ewn Ann vnd aller meiner erben gotleichem willen mit beschaidner red, ob ich in verziehen mag vo^er ehafter no^et, swie dev gehaizzen ist, so sol der selbe weingart no^ech meim tod der selben Samnnng ledichleich wesen vnd sol besvnder geho^ern zv° dem siechhauss also, daz der Siechmaister von dem vorbenanten weingarten dienen sol vnd geben ein dienst der vorbenanten Samnvng von zwain phunt phenning alle jar an meinem jartag vnd von dem vberigen sol er den siechen ier phfrvent pezzern. vnd dar vmb, daz disev red staet vnd vnzerbrochen beleib, gib ich der vorgenanten samnvng dis hantfest versigelt mit meins pru^eder Insigel Symons vnd auch mit mein selbs insigel ze einem ewigen vrchvnd. Des sind gezevg Meinhart mein geswey des Hv^etmvnds svn, Jans hern Gotschalchs svn, Weigman vnd Chunrat sein aidem, Reichher vnd Laevtmein (?) purger dacz Ybs vnd darzv^e manich pidber man. Diser prief ist gegeben, do van Christs gepvrt ergangen warn drevczehen hvndert iar vnd darnach in dem drevczehenten jar an sand Gorgen tag.

Source Fulltext: OÖUB 5 (Wien 1868) S. 108, Nr. 105