Ich Rueger der Topler von ofnpach vnd ich Karl vnd ich hainreich die topler von weichslpach Wir all drey brüeder verjehn an disem brief, das wir mit gemainem rat vnd mit guetlichem willen vns ze geweren pieten dem Abbt vnd der Samnung datz Pawngartennperg grabes ordenns des drittails des aigens auf der haid bey Sannd liennhart in dem vorst, das vnnser baid Muemen Peters vnd ofney hawgen to^echter von Jesentz dem vorgenannten Abbt vnd seiner Samnung haben ze kauffen gegeben nach vnnserm rat vmb Sechs phund phenning Wiener münss mit sollicher beschaidenhait, Was das vor genannt aigen tewr ist dann Sechs phund wiener phenning, dieselben vberteurung haben Sy ob jren Vodern Selen vnd ob irs Vatters Seel zu Seelgeret gegeben. Vnd sey wir auch desselben Seelgerets des vor genannten Abbts vnd seiner samnung Gwer nach lannds Recht also beschaidennlich, Wann die vor genannten Muemen ped zu der Ee komend, darnach jnner Jars frist sullen sy dem Abbt vnd der Samnung datz Pawngartenperg bestettigen das drittail des aigens auf der genannten haid nach lanndes Recht vnd all die weil die selb bestetigung nit beschehen ist von vnnser Sawmchait oder von derselben vnnser Muemen Sawmchait, so sey wir des vor genannten aigens gewer, als hie vor geschriben ist. Sawmbt aber es der Abbt oder sein Samnung, so sey wir des gelüb ledig, das wir hie an disem brief gelobt haben. Vnd das alles, das hie vor geschriben ist, sta^et vnd vnzerbrochen von vns hinfür beleib, des geb wir jch Rueger vnd jch Karl vnd jch hainreich die Topler dem Abbt vnd der Samnung datz Pawngartenperg disen versigelten brief mit vnnsern insigeln zu einem vrkund diser sach, diser brief ist geschriben, do von crists geburd ergangen warn M. CCC. vnd fünfftzehen Jar an Sannd Pauls abennt.

Source Fulltext: OÖUB 5 (Wien 1868) S. 148-149, Nr. 151