Ich Christan Drugseetz von Lengpach vnd mein havsvrow vrow Elspet veriehen vnd tv^en chvnd alle den, die disen prief lesent oder ho^ernt lesen, daz wir vmb vnser paider sel hail vnd vnser voderen dem. Gotshaus datz Pavmgartenperg zehen phunt gult wienner phenning vnsers rechten Aigen, daz leit in dem obern Ampt ob dem aenzeinspach vnd derselben zehen phunt wirt wol funfzehen phund, gegeben han Als beschaidenleich, daz ich dasselb gut, di weil ich leb, schol inn haben als tang, vntz ich demselben Gotshaus di selben gult gern vnd gu^etleiehen auf gib vnd nach meinem to^ed so schol die selb gult ledichleich hintz dem vor genanten gotshaus gehorn vnd schol auch swer des Pitantzen amt pfleger ist, di selben gult inn haben vnd schol all vreitag durch daz iar dreizzig phenning von der vor genanten gult vmb visch geben der Samnvng in daz Reuent, dar vber schol er auch derselben Samnvng igleichen pru^eder besunder vber sein gesatzt pfru^ent einen lo^effel o^els, der sibenzehen an ein phund gent, geben All vastag durch daz iar von derselben gult vnd schol auch der selb Pitantznaer von der vor genanten gult geben der selben Samnvng zwai dienst, igleich dienst von zwelif Schilling, der selben dienst schol er ains geben an dem phingst abent vnd daz ander an aller sel tag, swo man des nicht entaet, so schull wir vnd nach vns vnser erben der vor genanten gult vns vnderwinden als lang, vntz di selb pfru^ent paidew an vischen vnd an o^e1 als vor genant ist, den prudern ervollt wert; swann daz geschiecht, so schull wir in ir gult wider lazzen vnd schullen auch wir vnd vnser erben lautterleichen durch got desselben gotzhaus desselben Aigens scherm vnd gwer sain. waer auer, daz wir oder vnser erben in an demselben gu^et vngutleichen taeten, so schol in der Herzog hintz vns pezzern als zeitleichen ist. Dar vber offen wir, daz vns der Abbt vnd die Samnvng des vor genanten Gotshaus durch di grozzen lieb, di si zv vns habent, gelubt habent, zesprechen auf des heiligen Chraevtz Alter taegleich ein selmess vns vnd vnsern vodern zetrost vnd ze hail. Vnd daz disev red staet vnd vnzeprochen beleib, so gib ich vnd di vor genant mein hausvrow dem vorgenanten Gotshauss disev hantuest versigelt mit meinem insigel vnd mit meins geswein insigel hern Jansen von Chappell zu einem ewigen v^erchund. Der brief ist gegeben, do von Christ gepu^erd ergangen warn drevzehen hundert Jar vnd dar nach in dem Sechzehentem jar des mitichen in der phingst wochen.

Source Fulltext: OÖUB 5 (Wien 1868) S. 164-165, Nr. 166