Ich Hawg von Reichenstain vergich vnd tuen chund allenn den, die nun sind, vnd den, die hernach kunfftig werdent, die disen brief sehent oder ho^erend lesen, das Chunrat das Kind burger datz Perig von mir hat gehabt zu Rechtem Purckrecht meins freyen aigens ein hueben, die leit auf dem hard bey na^erden vnd haist datz Ainsidl vnd hat mir dauon gedient all Jar zun Vnnser frawen tag ze dienstzeit ain phund phenning, dasselb phund gelts han ich mit meiner hausfrawen frawn Elspeten vnnd aller vnnser baider Erben guetlichen willen gegeben dem Guster datz Pawngartennperg, der zu denselben Zeiten des liechts daselb vnd der gustrey pflag, vmb zwaintzig phund Wiener phenning. der ich genntzlichen bin gewêrt. Darüber vergich ich mer, das derselb Chunrat das kind alles das recht, das er hat gehabt an derselben hub datz Ainsidl, mit meinem vnd aller seiner Erben guetlichem willen demselben guster auch hat gegeben vmb zway und dreissig phund wiener phenning vnd ist auch derselben phening genntzlichen gewert, Vnd han ich dieselben hu^eb demselben gotshaws aufgegeben ledigklichen zu rechter Aigens gwêr auf Vnnser frawen Altar datz Pawngartennperg also, das die vorgenannt hueb mit alle dev vnd darzu geho^ert versuecht vnd vnuersuecht fürbas dienen sol der Gustrey datz Pawnpartenperg genntzlichen vnd ledigelichen, als sy mir vnd dem vor genanntem Chunraten hat gediennt Vnnd sol auch ich vnnd all mein Erben derselben hu^eb desselben gotshawss Scherm vnd gwêr sein nach lannds Recht. Gienng dem Gotshaws darann icht ab, das sol es haben auf alle dev vnd ich vnd mein Erben haben vnd fu^erbas gewinnen iu dem lannd versuecht vnd vnuersuecht. Vnd das dise Red sta^et vnd vnzerbrochenn beleib, darumb so gib ich dem vor genannten Gotshaws dise handtuest versigelt mit meinem Innsigel zu einem ewigen Vrchundt. Des sind gezewg her Marquart von Osterberch, her Chunrat von Vlacheneckh her hertneit von Chuleub, her Vreitel von Winthag, her Marquart von o^ed, her Chunrat von Mitterberch, Vlreich der hauser, herweich der holtzer, hainreich der Imtzinger vnd darzue manig pidberman. Der brief ist geben, do von Crists Geburd erganngen waren drewtzehen hundert Jar vnd darnach in dem Subentzehenndten Jar an Vnser Frawen tag zu der Liechtmess.

Source Fulltext: OÖUB 5 (Wien 1868) S. 183-184, Nr. 185