Wir Appt Christan vnd dev Samnung datz Pavmgartenperg veriehen vnd tvn chund alle den, di nv sind vnd den, di her nach chvnftich wernt, di disen prief sehent oder ho^ernt lesen, daz vns her Christan der Drugsoetz von Lengpach mit verdachtem mu^et vnd mit seiner havsvrowen vrovn Elspeten vnd mit aller ir paider erben gutleichem willen hat gegeben zv einem selgeraet seiner sel vnd aller vnd aller seiner vodern sel seines vreyen Aigens, daz leit pei Lengpach in dem obern Ampt in dem oentzeinspach Siben gu^et, di hie an disem prief benant sind: den hof datz Reichpetenpach, den hof datz woluerstorf vnd da selb zwo hofstet, den hof datz hag, ein lehen datz Algerspach vnd ein hofstat an dem perig. daz vor geschriben gu^et hat vns der selb her Christan gegeben mit alle dev, vnd dar zv^e geho^ert, versu^echt vnd vnuersu^echt vnd mit alle dev, vnd iz dient, iz sel gro^ez oder chlain, swi daz benant ist, als beschaidenleich, daz er das selb gu^et di weil er lebt schol inn haben als lang, vntz er vns das selb gut gutleichen auf geb, vnd nach seinem to^ed, so schol daz vor genant gu^et hintz vnserm gotshaus gehorn ledichleichen vnd an alle ansprach aller seiner erben swie die gehaizzen sind, vnd schol, swer des Pitantzen Ampt pfligt, das selb gu^et inn haben vnd scholl alle vreitag durch daz jar dreizzich phenning von dem selben gu^et vmb visch geben vnserr Samnung in daz Reuent; dar vber schol der selb pitantznaer vnserr Samnung geben igleichem pru^eder vber sein gesatztev pfrunt einen lo^effel o^els, der sibenzehen an ein phunt gen, alle vasttag durch daz Jar; vnd schol auch der Pitantzner von dem selben gu^et alle Jar vnserr Samnvng zwai dienst geben igle von zwelif schilling, der selben dienst schol er ainz geben an dem phingst abent vnd daz ander an aller sel tag. swo der pitantznaer das nicht entaet, so schol das selb gut hintz sand Andre pei der Traisem gehorn als lang, vntz dev savmchait paidev an vischen, an o^el vnd an den diensten der Samnvng werd ervollt. vnd ist auch der selb her Christan vnd alle sein erben des vor genanten gu^ets vnsers gotshauss scherm vnd gwer nach lands recht vnd swo vns der vor genant her Christan oder sein erben an dem selben gu^et vngutleichen taeten, daz schol vns der Hertzog hintz in pezzern als zeitleich ist. Dar vber offen wir, daz wir dem selben hern Christan durch dev grozzen lieb, dev er zv^e vns hat, gelobt haben zesprechen auf des heiligen Chraevtz alter taegleichen ein Mess von vnser vrowen im vnd allen seinen vodern ze hail vnd zetro^est. vnd vber dev red alle, di hie vor an disem prief geschriben ist, offen wir: ist, daz sich der selb her Christan dez bedencht, daz er vnserm gotshaus daz vor geschriben gu^et wil auz wegseln, so schol er vns inner lands vnd in v^erbar geben ein aigen, daz als gut ist als ditz vnd daz den vorgenanten dienst wol mag getragen, ist auer getan, daz dev wandlung nicht erget di weil her Christan lebt, so schvlle wier furbaz vmb daz vor geschriben gu^et weder von vrovn Elzpeten seiner hausvrowen noch von dehainem seiner erben dehainen wider wegsel nicht nemmen. Vnd dar vmb, daz disev red staet vnd vnzeprochen beleib, so geb wir dem selben hern Christann disen prief versigelt mit der erbern herren insigel hern Jansen des Abbts von dem heiligen Chroevtz vnd hern Otten des Abbts von zwetel vnd dar nach mit vnserm insigel zv einem ewigen v^erchund diser sach. Der prief ist gegeben, do von Christes gepu^erd ergangen warn drevzehen hundert Jar vnd dar nach in dem Sibenzehentem Jar an sand Jacobstag.

Source Fulltext: OÖUB 5 (Wien 1868) S. 197-198, Nr. 198