Ich Vlrich der hohelspeckh Ottn Sun des hehlspecken von Weinzurl vergieh vnd tuen khundt allen den, die nun sind oder hernach kunfftig werdent, die disen brief sehennt oder ho^erent lesen, das jch mit wol bedachtem muet vnd mit Otten vnd hainreichs meiner baider brueder vnd aller meiner Erben, wie die gehaissen sind, guetlichem willen gegeben han lediclichen dem Gotshaws vnd der Samnung datz Pawngartenperg meines anerstorben guets Zway lehen datz Münichofen jn Mencher pfarr mit alle dem, vnd darzue geho^ert, versuecht vnd vnuersuecht Vnnd bin auch jch vnd all mein Erben desselben guets desselben Gotshaws Gwêr nach Lannds Recht in Osterreich. Das vor genant guet han ich dem vor genanten Gotshaws gegeben zu einem Seelgera^et meiner Seel vnd aller meiner vodern seel also beschaidenlich, das der Abbt oder wer des Closters phleger ist, dauon sol geben ein volles dienst an Brot, an wein vnd an vischen der Samnung ja^erlich an Sand thomans tag vor Weinnachten. Wo man das nicht te\at, so sol sich der negst Erb desselben guets vnderwinden vnd sol es jnnhaben alslanng, vnntz die Sawmichait an dem dienst genntzlich werd erfüllt, wann das geschiecht ze hannt so sol das vorgenannt guet demselben gotshaws ledig sein als Ee Vnd sol auch an demselben Sand Thomans tag mein vnd aller meiner Vodern Jartag beganngen werden zu Pawngartenperg, alls gewonhait ist in grabem orden. Vnnd darumb, das dise Red stêt vnd vnzebrochen beleib, so gib ich demselben gotshaws disen brief versigelt mit meinem Innsigel zu einem ewigen Vrchundt. Des sind gezewg der hartneid von Chileub, der Vreitel von Winthag, der Chunrad von Vlacheneckh, Hainrich vnd Gotfrid sein baid Sun, Chunrad der Poschinger, Hainrich der Imtzinger, Herwort der lenperger, Herweich der Engelpolstorffer vnd darzu manch pidberman. Der brief ist geschrieben vnd gegeben, do von Christs geburd Erganngen waren drewzehen hundert Jar, darnach in dem Newnzehennden Jar an Sannd Ceciligen tag.

Source Fulltext: OÖUB 5 (Wien 1868) S. 253-254, Nr. 261