Ich Friderich der jung Redler des altenn hern Fridrichs sun des Redler von Sichtennperg, dem got gehad [genad?], vergieb vnd tuen kundt allen den, die disen brief sehend oder horend lesen; die nun sind oder hernach kunftig werdent, das ich zu der Zeit, da ich das wol getuen mocht, mit verdachtem muet vnd mit guetlichem willen aller meiner erben lediclich zu einem ewigen Seelgerêt gegeben han durch meiner sel willen vnd durch meines Vater Seel willen den Satz, der mir an meinem Erbtail zu Rechter fürzicht gefallen ist, Viertzig phund phenning Wiener münss, den Er vnd ich vnuersprochennlich jnn gehabt haben Sechtzig Jar vnd mer auf dem Altenhof bei Sand lienhart in dem Vorst, versuecht vnd vnuersuecht mit alle dem Recht, vnd wir jn Ennher haben jnngehabt, Lediclich vnd vnuersprochennlich dem Gotshaus vnser frawen vnd der Samnung datz Pawngartenperg Vnd bin auch ich desselben hofs jr Gwêr nach lanndsrecht also beschaidennlich, das die vorgenannten geistlichen herren datz Pawngartenperg mein vnd meines vatter des vor genanten hern Fridreichs vnd meiner muter frawn Cristein vnd meiner hausfrawen frawn Gedrawten vnd auch mein hinfürbas ewigclich jerlich gedencken sullen mit einem vollen jartag an Sand Cholmans tag, als gewonhait in dem orden ist. Wa^er aber, das Yemand hinfürbas den vor genanten Satz auf dem vor genanten Altenhof, den ich dem vor genannten gotshaws han jngeanntwurt vnd gegeben versuecht vnd vnuersuecht, lo^esen wolt vmb dieselben Viertzig phund an Sand Michelstag vmb New (sic) phenning Wiener Münss, des sollen die vor genannten herren nit wider sein zu lesen geben vnd sullen vmb dieselben Viertzig phund phenning ein Annder aigen kauffen, was das tragen mag mit der gewissen, damit der vorgenannt jartag verricht werd ganntz vnd gar an alles füerzoch. Wurde daran icht versawmbt, das mein erben jnn wurden, an dem jartag, als vorgeschriben ist, so sullen sich die herren von Lyennfeld des vor genannten guets vnndterwinden als lanng, vntz das die Sawmichait wol gepessert wert. Vnd das dise red sta^et vnd vnzerbrochen beleib, gib ich dem vorgenanten Gotshaws vnd der Samnung datz Pawngartenperg disen brief zu einem ewigen Vrchund versigelten mit meinem Innsigel. das ist geschehen, do von Crists geburd erganngen waren drewtzehen hundert jar vnd darnach in dem Newntzehenden jar an sand Cholmans tag.

Source Fulltext: OÖUB 5 (Wien 1868) S. 250-251, Nr. 258