Ich Herneid von Chvlevb offen vnd vergich an disem prief, daz ich an dem tag, do mein Housvrowe vrowe Matz, der got genad, datz dem Closter ze Pavmgartenperg bestatt ward, gelobt han dem Abbt vnd der Samnvng daselb mit mein trewen, daz ich von den nasten phingsten inner jars vrist, die schierist choment, chauffen sol sechs schilling gelts in vrbar vnd sol mein stevf svn her Charel von Luffenwerch hern kegen als vil chauffen in der selben vrist also, daz von zwelif schilling geltes derselben meiner havsvrowen jartag datz dem selben chloster alle jar sol begangen werden an dem nachsten vreytag vor sand Gorigentag, an dem selben tag, swer des selben Gotshavss phleger ist, der sol von den selben zwelif schilling gelts, die daz Gotshavs in nv^etz vnd in gwer ledichleich haben sol, der Samnvng einen dienst geben, als gewonhait ist, ze einem ewigen selgeraet der vorbenanten vrowen matzen sel vnd auch mein vnd meins svns Otten sel ze hilf vnd ze tro^est. Wer aber getan, do mich got vor behv^ett, daz ich in derselben vrist a^en geschaeft verfu^er, so sol der vorgenant mein svn Ott von der hab, die ich im lazze, die selben gult in derselben vrist dem vorgenanten Chloster chauffen on alle widerred vnd hat auch dar vmb gelubt vnd mir sein trew darvmb gegeben, vnd daz disev red staet vnd vnzerbrochen beleib, darvmb so gib ich der vorbenanten Samnvng datz Povmgartenperg disen prief versigelt mit meim Insigel ze einer waren v^erchu^end. Daz ist geschehen vnd diser brief gegeben, da von Christs gepurd ergangen waren drevtzehen hvndert jar, dar nach in dem zway vnd zwaintzgistem jar des eritags vor sand Gorigen tag.

Source Fulltext: OÖUB 5 (Wien 1868) S. 321-322, Nr. 331