Ich Chunrad von Alindorf ze der zeit purchgraf datz Sevsenek vergich vnd tvn chunt allen den, die disen prief an sehend vnd ho^ernt lesen, daz ich ze der zeit, do ich daz wol getv^en macht, mit wol verdahtem mu^et vnd mit gesamptem rat vrowen Gu^eten meiner hovsvrowen vnd mit aller vnserr peder erben gu^etleichem willen vnversprochenleichen meins rechten chaufaigens durch got vnd ab meiner sel vnd der vorbenanten vrowen Gu^eten meiner hovsvrowen vnd durch aller vnserr peder vordern sel willen vnd auch ze einer ablegung alle, den ich schuldich pin abzulegen, der ich nicht vinden mach, als ich gern tet vnd auch von recht solde gegeben han nach peichtiger rat ze einem steten vnd ewigen selgeraet daz gu^et datz Chraynperig zway lehen vnd zwo hofstet versu^echt vnd vnversu^echt, des sind vier phunt geltes, zway phunt ze weinahten vnd zway an sand Gorigentag, vnserr vrowen vnd dem Gotshavs vnd der Samnvng datz Pomgartenperig mit alle dem recht, als ich daz selbe gu^et han inne gehabt enher in rechter aigens gewer, ledichleichen mit nv^etz vnd mit rechter gwer vnd pin ich vnd alle mein erben des selben gu^ets des vorgenanten gotshauss vnd der Samnvng scherm vnd gewer nach lands recht, daz ist geschehen mit solher beschaidenhait, daz di selben geistlichen herren datz pomgartenperig vnd alle, die nach in choment hinfurbaz, von dem selben gu^et mein vnd vrowen Gvten meiner hovsvrowen vnd vnserr erben vnd aller vnserr vordern vnd vnserr scholer gedenchen sullen ewichleichen alle tag in der Messe, die man tegleich spriecht in vnserr vrowen Chappellen in dem Siechhavs mit der Collecten Deus, cuius misericordie non est numerus — von den toten, in der selben Chappellen han ich erwelt zeligen mit meim tod pet, swanne got vber mich vnd vber mein hovsvrowe gepevtet, als zwisschen vns daz emaln verschriben ist mit priefen verstet mit aim phunt geltes, dar zv offen ich, daz mir gelubt ist von der Samnvng si schullen mir vnd in selben auz richten ain phunt geltes, do habent siv von mir vmb emphangen achzehen phvnt wienner meiner beraiten phenning, daz wirt mit dem vordern gelt sechs phunt geltes vnd sullen die vorgenanten geistlichen herren alle iar von aim phunt ain dienst in dem Refent haben vnd sullen dar vmb meinen vnd alle der, den ich gepunden pin, iar tag an dem selben tag begen in der Chappellen, als in dem orden gewonleich ist. Dar zv schullen siv alle iar ain phunt phenning vor der porten armen leuten tailem mit der gewizzen, als verre siv mvgen gelangen oder waz man dar vmb gechauffen mag, durch meiner sel willen vnd ain phunt gelts sol dienen in daz Gvsterampt vmb ein ewigez liecht, daz in der Chappellen nacht vnd tag ewichleich prinne, vnd daz man da von pezzer pei dem alter, so man peste mvg. Dev andern drev phunt gelts sullen dienen dem Conuent in daz refent vnd sol man alle vreitag da von zwaintzich phenning vmb fichssch der Samnvng geben ze pezzerung irer phrvnt, als verre die mvgen gelangen, vnd swo des nicht geschech oder icht vergezzen wu^erd, so sol ich mich oder mein erben so zehant widerziehen zv dem selben aigen also lang, vntz mir vnd mein erben wol gepezzert wert dev savmvng noch vnserm willen vnd noch der Samnvng notv^erft. Dar vber daz ditze gescheft dem Gotshaus vnd mir vnd mein erben stet vnd vnzerbrochen beLeib, gib ich dem vorgenanten Conuent disen prief bestetiget mit meim jnsigel ze einem ewigen v^erchvnde. Des sint gezevg Her alram von Reichkerstorf, Her weichart von pernawe, Her walther des purchgrafen svn, Her walther von Meileinstorf, Pernhart vnd Hainreich die Jesentzer, Chunrat pv^echav, Hainreich wetzel, Gorig von herstorf, Jacob vierk, vlreich der schreiber, Chunrat Svnthaym, Herman vnd Marquart eysenhofen vnd dar zv ander erberr levt genvch. Daz ist geschehen vnd ist der prief gegeben, da von Christs gepu^ert ergangen warn drevtzehen hvndert iar, dar nach in dem drey vnd zwaintzgistem iar, des Svntags in den vier tagen in der vasten.

Source Fulltext: OÖUB 5 (Wien 1868) S. 342-344, Nr. 352