Ich Hainreich vnd ich Chunradt, Wernhardt, Rudolf vnd Wilhalm Bruder vnd vetter Grauen vonn Schawenberg Wir veriechen offenbar an disem brief vnd tun kundt allen den, die In ansehend oder horent lesen, das wir den Ersamen herrn ze Paumgartenberg vnd auch demselben Gotshaws durch got, vnsern vodern sele, vns vnd vnsern nachkomen ze Aschach an der mautt Ewigkleich ze ainen selegeredt ainem phundt fuder Saltzes gantze freihung vnd furvart der mautt vnd an alle foderung lassen vnd geben haben Also mit der beschaidenhait, das si vns dawider Ewigkleich alleJare des nechsten montages Nach sant Jacobstag ain recht vnd ain Jarlich au alles geuerde, als sitlich vnd gewonlich ist nach des Ordens recht begehen sullen mit vigili vnd mit Messen, als vnser leichnam hin entgegen stunde, vnd wer, das si des alle Jare gleich nit enteten Im geuerde vnd das wir vns des mit ainer gantzen warhait erfuren, So haben sich die Recht gegen vns allerdings wider verfallenn vnd sind der allerding ab Als lang, vntzen si sew von vns wider ausbringenndt. vnd das Ine vnd dem vorgenanten Gotzhaws ze Paumgartenperg das also stett vnd vnzeprochenn beleibenn, Daruber gebenn wir disen brif zw ainem vrkunth vnd ze ainer gedechtnus mit vnsern Insigeln versigelten. So verpinden wir bruder vns vnd (er) vnsers lieben bruder Graue Hainrichs Insigl alles das stet ze halten, Das an disen brif verschriben ist. der brif ist ze Schaumburgkh geben Ann sant Margarethen tag, Do man Zalt vonn Cristus gepuerdt Treytzehenhundert Jar vnd darnach In dem Trey vnd zwaynzigisten Jar.

Source Fulltext: OÖUB 5 (Wien 1868) S. 365, Nr. 370