Nos frater Chunradus dictus abbas Monasterii in Paumgartenperg tenore presentium profitemur, quod, cum ex uarijs eventibus magna debitorum congerie pregrauati maximeque per illa, que ad penam Obstagii contraximus, grauius artaremur, nec aliquod possemus excogitare remedium, quo eiusdem pene absque graui rerum nostrarum dispendio et presertim possessionum nostrarum distractionibus periculum evadere valeremus, Tandem karissimus in christo filius frater wolfhardus Monachus noster ex Ciuitate quidem ybsensi de honesta parente natus nostris succurrens et occurrens necessitatibus in hoc casu Quinquaginta libras denariorum wiennensium nobis obtulit vexationem debiti cum illis redimens, quod Monasterio nostro tunc periculosius in minebat. Verum quia idem frater wolfhardus pecuniam eandem, sicut est notorium, post mortem progenitorum suorum fuerat assecutus sueque dispensacioni, vt hanc in vsus pios conuerteret, ab illis erat credita et conmissa, Petiuit jnstanter, quatenus ob salutem et remedium eorundem progenitorum jnfirmarie nostre, que tunc inter alias nostras officinas, quantum ad substanciam exilior videbatur, pro reconpensa antedicte pecunie specialiter succurrere curaremus Censum illius per aditionem vnius saltim predii ex nostris possessionibus pro maiori jnfirmorum solatio augmentando. Nos igitur ipsius wolfhardi votis ac precibus tam rationabilibus annuentes Curiam nostram dictam Mulperg cum omnibus suis attinentiis de Totius nostri Conuentus consilio et consensu eidem jnfirmarie dedimus subi hac forma, vt js, qui pro tempore officinam eandem rexerit, omnibus et singulis ex quacumque necessitate jnfirmatorium intrantibus tam Monachis quam Conuersis tam nostris quam aliunde aduentantibus personis dumtaxat ordinis Supra consuetam Ouorum Pitantiam, que hucusque jnfirmis solito dabatur, Exnunc vnicuique quatuor Oua; per diem duo videlicet ad prandium et ad Cenam totidem de prefate Curie prouentibus dare omni tempore teneatur occasione aliqua non obstante, nisi forte causa legitima et maxime Ouorum in hyeme nimia karistia quandoque id inpediant (sic) faciendum . de quo sane inpedimento Prior aut tenens Conuentum cum quatuor Senioribus domus habebunt cognoscere et super hoc jnfirmarium conuenire. Insuper premissis duximus subiungendum scilicet, vt si in posterum aliquis successorum nostrorum abbatum quacunque licet occassione (sic) Officinam memoratam sepedicta Curia spoliare aut quidquam de.illius obuentionibus siue fructibus suis presumeret vsibus applicare, Ex tunc jnfirmarius, si visitatoris patrocinio, ad quem in casu tali erit sibi primitus recurrendum, eiusmodi iniuriam non poterit evincere oportune jpso forte factum dissimulante aut paruipendente, ad brachii secularis e vestigio confugiet auxilium jta plane, vt mox quempiam de cognacione sepedicti Wolfhardi, qui tunc potior invenitur, Conueniens et de qualitate grauaminis plenius instruens sibi postulet super tanta violencia subueniri. Cui eo ipso licebit tam de jure quam de facto vim vi quodammodo repellendo Res Monasterii nostri absque omni juris strepitu occupare tam in arida quam in aqua, donec jnfirmarie de vniuersis indebite sic ablatis restitutione plenaria fuerit satisfactum. Igitur vt premissa omnia et singula premissorum in suo robore inviolabiliter ex nunc in antea perseuerent, presens instrumentum conscribi super hiis fecimus et jnfirmario ad perpetuam rei memoriam reseruandum tradidimus Sigillorum videlicet Reuerendi Patris nostri et domini Sancte Crucis ac nostri munimine efficaciter roboratum. Datum et Actum Anno domini M° c° c° c°. xxiij°. In die beate Marie magdalene.

Source Fulltext: OÖUB 5 (Wien 1868) S. 367-368, Nr. 372