Ich Rudolf der Motz zv der zeit Rihter ze Chrems vnd wier der Rat von Chrems vnd von Stain wier verriechen an disem prief vnd tun chunt allen den, die in sehent oder hornt lesen, di nv sint oder nach chu^eftig werdent, Daz vnser herre Chunick Fridrich von Rom vns sein offen prief sant, daz wier von den gaistlich herren von Pavmgartenperge nicht mere schvllen Steur nemen von irem hof ze Chrems denn alle iar ein march silber, nv chomen die vorgenanten gaystlich herren fuer vns vnd paten vns durch got vnd durch recht bescheidenheit, daz wier ir no^etdurft erchanten vnd sev der genaden liezzen geniezzen, die in der vorgenant vnser herre Chunick Fridrich het getan vnd auch geben, daz wier in dez ein vrchunde gaeben mit vnserm prief. Des haben wier mit gemaynem rat den vorgenanten gaystlichen herren gelu^ebt, daz selbe recht vnd genade sta^et fuerpaz ze allen zeiten behalten also, daz sev alle jar nicht mere schullent ze Steur geben denn ein march silber, dev schullent sev auch geben alle iar an sand Georij tag. Daz in daz fuerpaz von vns vnd von vnsern nachchomen staet beleib vnd vnzerbrochen, daru^eber geben wier disen prief versigelt mit der Stat insigel ze Chrems zu einem vrchunde vnd zu einem worn gezeug diser sach. Der prief ist geben, do von Christes gepurt worn ergangen drevzehen hundert iar, in dem Siben vnd zwainczistem Jar ze Phingsten.

Source Fulltext: OÖUB 5 (Wien 1868) S. 481-482, Nr. 484