Ich Swester ofmey zu den zeitenn Priorin vnnd der Conuent gemain der Frawen datz Minnpach wir verjehen vnd tuen kundt allen den, die disen brief sehennt lesend oder ho^erent lesen, das wir mit veraintem rat vnd mit guetlichem willen aller vnnser Samnung haben ze kauffen gegeben lediclichen dem Gotshaws vnd den geistlichen herren Abbt Eberharten vnd der Samnung datz Pawngartenperg vnnsers freyen Purckrechts zwo hofstet, die wir gehabt haben datz Chrembs ob der Pruckh auf der Krembs vmb ein genannts gu^et, des wir redlich gantz vnd gar an schadn gewert sein ze den ta^egn, als vns gelu^ebt ward, mit alle dem Recht, als wir sy haben Ennher jnngehabt jn rechter aigen Purckrechts gewer, versuecht vnd vnuersuecht an alle Ansprach, vnd sein auch wir des vorgenanten Gotshawss vnd der Samnung desselben gu^ets gwer nach lanndtrecht, als purckrecht des Recht hat, wo des not wirt. Vnd darumb, das dise red sta^et vnd vnzerbrochen beleib, so geben wir jn disen brief Bestetigt mit vnnsern baiden Innsigiln zu einem waren vnd sta^etn Vrchund. Das ist geschehen vnd ist der brief geschriben vnd gegeben, do man von Crists geburde zalt drewtzehen hundert Jar, darnach in dem Acht und zwaintzigisten Jar an der Aindlef Tausennt Maidtag.

Source Fulltext: OÖUB 5 (Wien 1868) S. 526, Nr. 525