Ich Chalhoch der Hauser vergich vnd tvn chund allen den die nv sind vnd hernach chvnftich werdent, di disen prief an sehent lesend oder hornt lesen, daz ich mit wol bedachtem muet vnd mit gutleichem willen aller meiner erben vnd nach mainer vreund rat gesatzt han ledichleichen meinen hof datz Chemnatpach meinem vetern Vlreichen dem Hauser vnd allen seinen Erben mit alle dem recht vnd ich in han inn gehabt, fuer vir vnd vierzich phunt alter wienner phenning, der ich ganz vnd gar bericht pin an allen schaden, mit sogtaner beschaidenhait, daz der selb Vlreich der Hauser vnd sein erben irn frvm schaffen schullen mit demselben sacz ze versatzen oder ze geben wem si wellent ze alle dem recht vnd siv in inn habent fuer di vorgenanten vir vnd virzich phunt phenning an alle widerred vnd an alle irrung mein vnd aller meiner erben. vnd schol auch di losung desselben hofs sein jarleich ze weynachten vmb alt phennung. vnd pin auch ich Chalhoch der Hauser vnd alle mein erben desselben hofs vnd des satz dar auf des des vorgenanten Vlreichs des Hauser vnd aller seiner erben vnd swer den satz inn hat gwer nach landerecht. gieng in dar an icht ab wigetanen schaden siv des nement, den schullen siv haben auf aller der hab vnd ich vnd mein erben haben in dem land versuecht vnd vnuersuecht. Vnd dar vmb daz disev red staet vnd vnzebrochen beleib, so gib ich Chalhoch der Hauser dem vorgenanten Vlreichen dem Hauser vnd allen seinen erben vnd dem, der den satz inn hat, disen prief bestaetigt mit meinem insigel czv einem gezeug vnd waren vrchund. Des sind gezevg her Vreytel von Winthag, her Ott der Hauser, Her Ott der Chuleuber, Hainreich der Impzinger, Herweich der Holtzer, Wetzel von Arbing, Herweich der Engelpoltstorfer vnd ander pidber laeut genvech, den di sach wol chund ist. Der prief ist geben do man zalt von Christes gepverd drew zehen hvndert Jar dar nach in dem dreizzigisten Jar des nachsten Sventags vor sand Gyligen tag.