Ich Chunrat der Jesnitzer vergiech offennlich vnd tuen kundt allen den, die nun sind vnd hernach kunftig werdennt, die disen brief ansehennt. lesent oder horent lesen, das ich ein Wis, die haist die Fuchslewtterin, der ist drew tagwerich vnd leit in Newsteterpfarr, die mein freyes aigen was vnd was mich angeuallen ze Rechter fürzicht getailt von meinen geschwistreiden vnd was Chunradts von Wolfstain rechts lehen von mir. Dieselben wis han ich verkauft demselben Chunraten von Wolfstain mit wol bedachtem muet, da ich es wol macht getuen, vnd mit all meiner Erben guetlichen willen lediclichen vnd vnuerschaidennlichen an alles geuerd mit aller Aigennschaft vnd mit allem dem Recht, als ich sy vnd mein vodern Ennher habent pracht in Rechter Aigens gwer, versuecht vnd vnuersuecht vmb zehen phund vnd vmb Sechtzig phenning Wiener mu^ens, der ich ganntz vnd gar an schaden gewêrt bin. Vnd die vor genant wis hat der Egenant Chunrat gegeben dem Gotshaws vnd der Samnung ze Pawngartennperg mit Aigennschafft vnd mit allem dem Recht, als ich jm sy ze kauffen han geben, als vor an disem brief geschriben ist, mit meinem guetlichen willen. Vnd bin auch ich vnd all mein Erben desselben Chunrats von Wolfstain vnd des Gotzhaws vnd der Samnung ze Pawngartennperg, oder wer Sy von dem Gotshaws hat, Gwer Nach Lannds Recht. Gieng in aber an jcht ab, allen den schaden, den Sy dauon nement, den sullen Sy haben auf meiner wis vnndter dem Stainperg, die da geho^ert zu der hub, die da haist an dem Kirchweg. Vnnd darumb das die Red sta^et vnd vnzebrochen beleib von mir vnd von all meinen Erben, darüber so gib ich dem Egenannten Chunraten von Wolfstain vnd dem Gotshaws vnd auch der Samnung ze Pawngartennperg disen brief zu einem waren gezeug vnd ewigen Vrchundt diser sach versigelten mit meinem Anhanngunden Insigel. Der sach sind gezewg Bernhart, Hainreich, Hanns, Hartneit mein vier brueder vnnd annder piderwer lewt genueg. Das ist geschehen vnnd ist der brief geschriben vnd gebenn, do von Christs geburd ergangen waren drewtzehen hundert Jar, darnach in dem zway vnd dreissigisten Jar, des nagsten phintztags nach dem Prehentag.

Source Fulltext: OÖUB 6 (Wien 1872) S. 45f., Nr. 37