Ich Herweich von Enngepoltstorf vergich offenwar vnd tuen kundt allen den, die disen brief ansehent, lesent oder ho^erent lesen, das ich mit veraintem Rat vnd mit guetlichem willen Frawen Margreten meiner hausfrawen vnd mit rechter verhenknus vnnser beder erben durch got vnd durch aller vnnser vodern Seel willen zu einem ewigen Seelgeret meins freyen Erbaigenns gegeben han ewigclich vnd ledigclich dem Gotshaws vnnser Frawen vnd der Samnung datz Pawngartenperg alles das Recht, das ich vnd mein Erben gehabt haben in dem Satzwerd, Besunderlich an dem guet, do zu den Zeiten der Waser aufgesessen was, an holcz, an Veld, ann Wismad, versuecht vnd vnuersuecht, wo das sey mit allem dem nutz vnd gwer, als ich es vnd all mein Vodernn haben Ennher pracht. Vnd bin ich vnnd all mein Erben desselben guets des vor benanten Gotshawss vnd der Samnung Gwer nach lannds Recht, als das Seelgeret Recht hat. Vnd daru^eber das ditz mein vnd aller meiner Vodern Seelgerêt Sta^et vnd vnuerwandelt hinfur pas beleib, gib ich dem offt genanten gotshaws vnd der Samnung disen brief bestetigett mit meinem anhangunnden Innsigell zu einem Zewg vnd zu einem Ewigen Vrchundt. Das ist geschehen, do von Crists Geburd erganngen waren drewzehen hundert Jar, darnach in dem Vier vnd dreissigisten Jar, an dem heiligen Weinnachtstag.

Source Fulltext: OÖUB 6 (Wien 1872) S. 144, Nr. 136