ICH Alram Reichkerstorfer, weilen Purchgraf datz dem Havs pey Wiselburch vergich öffentlich vnd tu^en chunt alle den, die nv sind vnd hernach chv^emftich werdent, die diesen Brief ansehend, lesend oder ho^ernt lesen, Daz ich mit vroven Chvnegunten meiner Hovsvrowen vnd mit allerr vnserr erben gu^etlichem willen ze der zeit, do ich daz wol getv^en macht, mit wolverdachtem sinn durch Got vnd ab meiner Sel vnd durch aller meiner vordern Sel willen ze einem ewigen Selgeraet gegeben vnd in geantwu^ert han in nvtz vnd in gwer, dem Gotshavs vnserr vrowen vnd den Geystlichen Levten der Samnvng datz Pavmgartenperg meins rechten vreyn chauf aygens ain hofstat an Sand Stephans perig pey Pvrchstal mit alle dev vnd dar zv^e geho^ert versv^echt vnd vnversv^echt, wie daz benant ist, vnd pin ich vnd alle mein erben des selben gu^ets, des vorbenanten Gotshavss, vnd der Samnvng gewer noch Landes recht. Vnd daz Selgeraet ist geschehen also beschaidenlich, Daz der Abbt mit dem Conuent mit priefen vnd mit iren trevn nach meiner pet sich des gegen mir verpvnden habent, daz siv mier vnd meinen Hovsvrowen vnd alle mein vordern, alle jar ewichleich sullen sprechen die auzgenommen dreizzich Messe an vnderlaz vnd sullen die an gevangen werden des Maentages jerleich noch dem Svnnetag in den vier tagen in der vasten vnd swelich prister die Messe sprichet, der sol von den vorgenanten phenninch dienst von der Hofstat drey phenning ze offer haben, die er zv seim nvtz vrlebleich schaffen sol. Swaz danne vber wiert phenning, do sol der abbt an demselben tag den herren in daz Refent ain pezzerung mit vischen oder mit ainer anderr Pytanz zv irer gesatzden phru^ent geben, als vil die phenning getragen mvgen, vnd swo daz selbe Selgeraet vnd die Messe versavmet wurden, des Got nicht engeb, so sol ich mich oder ander mein nahst erben zv dem vorgenanten gu^et also lang ziehen, vntz daz dev Samnvng wol mit der gewizzen werde gepezzert, so ist daz gu^et wider ledich dem Gotshavs on allen chrieg. Dar vber daz ditz mein gescheft vnd mein Selgeraet hinfv^er baz stet vnd vnzerbrochen beleib, gib ich dem vor oft genanten gotshavs vnd der Samnvng diesen Brief bestaetiget mit meinem jnsigel zv einem ewigen vrchvnde. Daz ist geschehen vnd der Brief dar vber gegeben, do man zalt von Christes gepv^erd drevtzehen hvndert jar vnd fu^emf vnd dreizzich jar, an sand Bartholomestag des zwelifpoten.

Source Fulltext: OÖUB 6 (Wien 1872) S. 176f., Nr. 169