Ich Ortolf der Trachter vergich offenwar vud tuen kundt allen den, die disen brief ansehent, lesent oder ho^eren lesen, das ich mit wol bedachtem muet vnd mit guetlichem willen aller meiner Erben meines freyen aigenns ein lehn datz Pirichach, daz mich ze rechter fu^erzieht getailt ist angevallen von meinen geschwistreidenn, verkauft han durch ehaft not den Erbern geistlichen herren vnd dem Gotshaws datz Pawngartenperg mit alle dem, das darzu geho^ert ze holtz vnd ze Veld, versucht vnd vnuersuecht mit alle dem Recht vnd ich es ennher vnd mein vodern in Rechter aigens gwer gehabt haben vmb Acht phund phenning Wiener münss, der ich gantz vnd gar gewert pin. Vnd dasselb guet ist Sechtzig phenning gelts, desselben gelts sol, wer schaffer ist in dem closter, Reichen dreissig phenning vmb visch dem Conuennt in das Refent ja^erlich an sand Erasm tag an all wider Red. Vnd bin auch ich des vor genanten guet der Egenanten herren vnd jrs gotshawss gwêr nach lanndes Recht, wo in des not geschiecht für all Ansprach. Kha^em aber daruber Yemann hinfu^erbas, der in das guet wolt zu chrieg machen vnd ein besser recht daran wolt haben, so gib ich in zu einer pessern bestettigung auf demselben guet ze Rechtem Satz nach lannds Recht dreissig phund wiener phenning Vnd sol die lesung sein jerlich an Sand Michelstag vmb new phenning vnd denselben Satz sol einnemen an des gotshawss stat, wer des Gotshawss Vogt ist, vnd sol dieselben phenning dem Gotshaws legn an ein annder aigen mit der gewissen an alles geuerde Nach der Altherren Rat in dem closter. Vnd darumb, das dise red sta^et vnd vnuerkert beleib, gib ich dem vor genannten herren vnd dem Gotshaws datz Pawngartenperg disen brief zu einem warn vrchundt versigellt mit meins herrn Innsigell herrn Jannsen von Cappelln vnd mit herrn Wetzleins Innsigel von Erwing, der zu den zeiten lanndtrichter was in dem Machland, des Sy gezewgen sind mit jren jnnsigeln, wann ich selbs nicht jnnsigels han. der red sind gezewg hainreich von Imbtzing, Herwort der Frey, Herwort der Lengperger, Herwort der Ennglpoltstorffer, Leutold von Mitterberch, Chunrat der Pranger, die disen kauf gestifft haben, vnd darzu ander pidberlewt genueg, den das kundt ist. Diser brief ist geben, do von Crists geburd erganngen waren drewtzehen hundert jar, darnach in dem Su^eben und dreissigisten Jar des Suntags vor Vaschanng.

Source Fulltext: OÖUB 6 (Wien 1872)S. 229f., Nr. 225