Ich Gotschalich von Flacheneckk vnd ich Weichart von Retelnperg verjehen offenwar vnd tuen kundt allen den, die disen brief ansehennd, lesent oder horent lesen, das wir mit wol bedachtem muet, do wir das wol getuen mochten, vnd mit guetlichem willen aller vnser erben vnd mit verhencknus aller vnnser frewndt geben haben dem gotshaws vnd der Samnung ze Pawngartenperg zu einem ewigen Seelgeret vns, vnsern Vodern vnd auch allen vnnsern nachkomen vnd besunderlich zu hilff vnd zu trost Frawen Perchten Seel von ra^etelnperg, die das geschaft hat an jrn lessten zeiten, zwai guet Rechts eribaigenns, die hie benannt sind, das lehn in dem dawtschpach an der Pranntstat in Rabenstainer pfarr vnd dient für allen dienst Subn Schilling phenning vnd drey vnd zwaintzig phenning. Das lehen an dem Swartzenperg an Ruedolfstat in Kirichperger pfarr vnd dient funff und sechtzig phenning, mit alle dev, vnd darzu geho^ert ze holtz vnd ze veld, versuecht vnd vnuersuecht vnd mit alle dem Recht, als wir sew vnd auch vnnser vodern jn Rechter aigens Gwer vntz her gehabt haben, mit so getaner beschaidennhait, das wir vnd all vnnser nachkomen des vor genannten guets sein sullen vogt, scherm vnd auch Gwer für allen gewalt, für allen chrieg vnd für alle ansprach, wo des not geschiecht nach lannds recht. Wa^er aber das getan, das wir oder vnnser ainer oder vnnser nachkomen ainer das egenant Gotshaws vnd die Samnung an dem vor genanten guet oder an jrn lewten beswa^ern wolt mit eim gwallt oder mit vnzeitlicher vodrung, ze hannt hat sich desselben vogtrecht vnd sein Scherm lediclich verfallen an allen chrieg also, das die Samnung zu Pawnngartennperg dann freye wal hat zu nemen zu einen Vogt vnd zu einem Scherm über das vor benant gut, wer ir darzu gefellt. Darzu offenn wir, ob yemann kam hinfu^erbas, der dem Gotshaws vnd der Samnung das vorgeschriben guet zu chrieg wolt machen vnd ein besser Recht darzu wolt haben, was die Samnung dauon kunffticlich Schaden nymbt, den sy mit der gwissen zeln mag, den sol Sy haben auf vnsern trewen vnd auf aller der hab, die wir haben in dem lannd zu O^esterreich so lang, vntz wir jr jrent Schaden wider keren vnnd ganntz vnd gar ablegen. Vnd darumb, das dise Red stêt vnd vnuerkert beleib, geb wir dem vor genanten gotshaws vnd der Samnung ze Pawngartennperg disen brief zu einem waren vnd zu einem ewigen Vrchundt versigellten mit vnnser paider anhangunden Innsigeln. Dieser brief ist geben vnd geschriben, da von Crists geburd erganngen waren drewtzehen hundert jar, darnach in dem Newn und dreissigisten Jar an sand Jacobs tag in dem Schnit.

Source Fulltext: OÖUB 6 (Wien 1872) S. 304f., Nr. 300