Ich Elspet die Khemnaterin vnd jch Chunrath der Khemnater frawn Elspeten Sun vnd ich Vlrich der Chemnater frawn Elspeten Sun veriehen offenwar vnd tu°n kundt allen den, die disen brief ansehend, lesent oder ho^erennt lesen, das wir mit wol bedachtem mu^et vnd mit guetlichem Willen aller vnnser Erben ze chauffen haben geben dem Gotshaws vnd der Samnung zu Pawngartenperg süben vnd tzwaintzig phund wiener phening, die wir gehabt haben auf dem chunigshof in Krewtzer pfarr, die mit Recht in vnser gewalt sind komen mit sogetaner beschaidenhait, das wir noch khainer vnnser Erben auf dem vorbenannten hof hinfûrbas ewielich nymmer mer kain Ansprach sullen haben. Cha°m darüber Yeman, der dem egenanten hof der vor benanntn Samnung zu chrieg macht, dauon Sy Schadn nemen, so sullen Sy die herren von der Samnung zu Pawngartnperg die vorgeschribenn Süben und zwaintzig phund phenning vnd was Sy da uon chrieg schaden nement, haben auf vnnsern trewen vnd auf aller der hab, die wir haben. Vnd darumb, das dise Red sta^et und vnuerchert beleib, geb wir dem Gotshaws vnd der Samnung ze Pawngartnperg disen brief zu einem ewigen Vrchundt versigellt mit vnsers herren Innsigel hern Jansen von Cappellen, der diser Sach damit gezewg ist, wann wir selber nicht aigner Innsigel haben, darunder verschriben dise warhaft Zewg, den die sach wol khundt ist, her hartneid der vleischess, her fridreich sein brueder, her Wetzl von Erwing, Seibot von Newnhofen, Weichart der alt Lanndtrichter, Jans sein brueder vnd darzu ander pidber leut genug. Diser brief ist geben, do von Crists geburd erganngen waren drewtzehen hundert Jar, darnach in dem Newn und dreissigisten Jar an der heiligen Zwelfpoten tag sand philips vnd sand Jacobs.

Source Fulltext: OÖUB 6 (Wien 1872) S. 297f., Nr. 294