Ich Gerunch der Mitterchircher vergich offenwar vnd tuen chund allen den, die disen brief ansehend, lesen oder ho^erennt lesen, das ich mit wol bedachtem muet vnd nach meins hern Rat, hern Jannsn von Cappellen, der diser Sach Taidinger vnd Schidman gewesenn ist an des hertzogenn Stat von O^esterreich, verchauft han den Erbern herren ze Pawngartenperg alles das Recht, das ich vnd mein erben gehabt haben an der hu^eb zue Imtzing, die gelegen ist in Mitterchircher pfarr. die mein Vetter Ott der Mitterchircher, dem go genad, emalen geschafft het an seinen lessten zeiten zu dem vor benannten gotshaws Im vnd allen seinen vodern zu einem ewigen Seelgeret, vmb ein genanntes gu^et, des ich gantz vnd gar bezalt vnd bericht pin also beschaidenleich, das ich vnd mein Erben vnd all mein Nachkomen hinfürbas Nymmer mer kain krieg noch khain Ansprach darauf haben sullen, wann wir mit guetlichem willen mit einem chauf gantz vnd gar dauon gestannden sein. Ich sol auch mitsambt meinen Erben des egenanten guets gwer sein an aller Stat, wo des den egenannten geistlichen herren not geschiecht, fu^er all Ansprach nach lanndes Recht in o^esterreich. Das dise Red von mir vnd von all mein Erben sta^et vnd vnuerchert beleib, gib ich dem vorgenanten Gotshaws ze Pawngartennperg vnd den herren daselben disen brief zu einem ewigen Vrchundt, versigelten mit meinem anhangunden Insigel vnd zu einer bessern bestettigung mit meins herrn Innsigel herrn Jannsen von Cappellen vnd mit hern Wetzleins Innsigel von Erwing, der zu den zeiten lanndtrichter was jnn dem Machlannd, die diser Sach mit jren Innsigeln gezewg sind. Diser brief ist geben vnd geschriben nach Crists geburd v^eber drewtzehen hundert Jar, darnach in dem zwai vnd viertzigistenn Jar an des heiligenn Krewtztag nach Osternn.

Source Fulltext: OÖUB 6 (Wien 1872) S. 412f., Nr. 408