Ich Lorenntz von Öd zv den zeiten Lannd Richter in dem Machlannd vergich offenwar vnd tuen kundt allen den, die disen brief sehennt oder ho^erent lesen, die nun sind oder hernach kunfftig werdent, daz für mich komen sind in offner Schrann hainrich der Wedel vnd sein hausfrau alhait, Fridel Vlrichs Sun in dem Pawngarten vnd sein hausfraw Geisel, Vlrich ha^edweigen sun vnd sein Swester Margret, Vlreich in dem Pawngarten vnd sein hausfraw Agnes, Chunigunt, Kathrey, Alhait vnd Wentel Marcharts to^echter vnd auch die andern Erben, wie die genant sind, vnd habent aufgeben die brief vnd die hanntuesst, die Sy gehabt haben vber die guet zu Eytzenndorf vnd die hie benant sind. Das erst haist Wulfings lehen, das annder der Chochin hofstat, das dritt des Murrn hofstat, das viert haisset hainreichs des Prenner hofstat, vnnd Teten sich derselben güetter vnd alles des, das darzue gehört ze holtz vnnd ze veld, versuecht vnd vnuersuecht, fürzicht als Sich frawen vnd man zu Rechter fürzicht sullen tuen vor Rittern vnd vor Knechten in offner Schrann also, daz dieselben Güeter des Gotshauss ze Pawngartenperg ein geruebts aigen sullen sein von vns vnd von allen vnnsern Erben, die yetzund sind oder hernach kunfftig werdent, für allen chrieg vnd für all Ansprach. Vnnd darumb, das dise Red stêt vnd vnuerkert beleib, gib ich dem Gotzhaws ze Pawngartenperg disen Brief zu ainer waren gezewgnus versigelten mit meinem anhangunden Irinsigel vnnd mit hern Freytleins vnd mit hern Wetzleins vnnd mit Weicharts anhangunden Innsigeln, die diser Sach damit gezewg sind. Der brief ist geben nach Crists geburd drewtzehen hundert Jar vnd darnach in dem Vier und viertzigisten Jar an Sannd Jörgen tag.

Source Fulltext: OÖUB 6 (Wien 1872) S. 477f., Nr. 472